Diasabra 11 di mei, pa 7:30 pm Arubaanse Kunstkring ta presenta na Cas di Cultura “A Musical Evening” cu e grupo Rochela como e atraccion principal. E palabra rochela na Spaño ta nifica diversion y esey ta loke e grupo musical Rochela ta trece Aruba: diversion, fun, plezier.
E lider di e grupo ta e tocado di cello Germán Marcano kende ta hopi conoci pa su conciertonan cu Aruba Piano Festival (di Armand Simon) y cu Nuevo Mundo Music Festival & Academy (NMFA) di Simon Gollo. German Marcano ta un di e cellistanan mas importante di America Latino. Su CV ta largo y interesante. El a gradua di Surrey University, Inglatera, caminda el a studia bou di guia di Stefan Popov y William Pleeth. El a participa den varios tour como solista, musico di camara y maestro di academia manera el a haci aki algun aña pasa cu NMFA. E otro miembronan di e grupo ta Gonzalo Teppa, contrabaho; Jorge Glem, cuarto y Manúel Rangel, maraca.
Ademas di Rochela lo actua tambe Vento do Norte, e grupo di 5 saxofonista Hulandes bou di Henk van Twillert cu a toca na Aruba pa prome bes na 2011. Na 2017 mi a skirbi lo siguiente di un concierto di nan: “Siman pasa na Cas di Cultura mi a presencia un di e conciertonan mas conmovedor den mi bida, e concierto cu Kunstkring a presenta di e conhunto musical Vento do Norte.”
Grupo Serenada di Corsou cu diesdos miembro bou di direccion di Henri Moen lo ta di tres grupo pa actua e nochi ey. Serenada ta conoci pa su manera unico di presenta canticanan crioyo.
Laga nos mustra e boluntarionan di Arubaanse Kunstkring cu nos ta aprecia nan trabou y mustra nos cara na e Musical Evening. Entrada ta costa apenas 35 florin pa persona.
Te diasabra nochi 7or y mei na Cas di Cultura. Trece bo famia y amigonan!
Skirbi pa Clyde Harms
