Diaranson prome di mei 2024, Minister Ursell Arends a tene un reunion importante cu ehecutivonan di International Civil Aviation Organisation (ICAO). E reunion aki a sosode durante e evento di “Global Implementation Support Symposium”, cu a tuma luga na Republica Dominicana.
E evento, organisa anualmente pa ICAO, tin como meta pa stimula sosten, facilita programa pa desaroyo di capacidad, y promove desaroyo sostenibel entre su estadonan miembro.
Minister Arends, hunto cu funcionarionan di Departamento di Aviacion Civil di Aruba, a sostene un encuentro importante cu Juan Carlos Salazar, Secretario-General di ICAO, Christopher Barks, Director-Regional di ICAO pa Norte-America, Centro-America y Caribe, y tambe Jorge Vargas, Director di ICAO-CDI (Capacity Development and Implementation Bureau).
E encuentro a bay den un ambiente sumamente positivo y constructivo. A toca diferente tema di relevancia, manera e proceso pa converti Departamento di Aviacion Civil den un entidad autonomo cu su propio fluho di entrada, conectividad aereo den nos region, aviacion sostenibel, desaroyo di Aruba su sistema di transporte, ampliacion y modernisacion di Aruba su aeropuerto (gateway 2030) y tambe implementacion di identidad di biahero digital (“Digital Travel Credential”) a traves di e plataforma di Aruba Happy One Pass (AHOP).
Tambe a elabora riba e desafionan cu ta wordo en contra door di Aruba, siendo un isla chikito. Un di e desafionan aki ta e dificultad pa por haya personal califica pa trabounan specialisa. Finalmente a papia di aliansanan y cooperacionnan cu Aruba ta haciendo uzo di dje pa asina complementa su trabounan y pa por keda garantisa siguridad di nos industria di aviacion.
ICAO a keda masha contento y impresiona cu e update ricibi. ICAO a elogia Departamento di Aviacion Civil di Aruba pa e manera proactivo y dinamico con Aruba ta evolucionando su mes a pesar di tur e desafio cu ta enfrentando, y a reitera cu e profesionalnan Rubiano ta gosa di un bon reputacion den e ramo internacional di aviacion.
Minister Arends a enfatisa di lo sigui cu e trabounan cu actualmente ta desplega, den e cuadro di acuerdonan cu a haci cu ICAO, y lo keda tene ICAO na altura di e progresonan. ICAO di su banda tambe a re-confirma cu lo brinda Aruba apoyo y sosten unda cu por.
