Segun director Wesley Kook, Selikor nan tin localidadnan publico pa mantene limpi. Ta haya esaki vooral canto di camindanan principal. Tin contratistanan cu ta cumpra nan servicio pa asina nan continuamente keda mantene e camindanan limpi.
Nan ta piki sushi cu por considera como zwerfvuil, sushi cu ta trafica canto di caminda. Toch tin hende cu tin e mal custumber de bes en cuando di laga sushi cay for di auto y asina ey susha e careteranan.
Asina tin tambe de bes encuando ta drenta den bario y haci limpiesa riguroso den bario. Gran parti di e servicionan ta concentra riba recogemento di sushi na cas pa cas y recogemento di sushi na empresa.
Cobransa
Selikor conoce cliente. Nan no ta un compania subsidia manera ta haya un montante di cen y no tin un contraprestacion pa cada servicio. Nan conoce cliente y gobierno ta un di e clientenan, esun di mas grandi si, pero toch un cliente. E servicionan cu nan ta duna pueblo di Corsou, nan ta cobra gobierno pa e servicionan aki.
E servicionan ta defini, manera recogemento di sushi di cas, unda cu nan ta cobra 20 florin pa luna pa cada cas cu nan recoge. Esaki ta wordo recogi un biaha pa siman na casa cas. Depende di cada cas cu tin, gobierno ta paga e montante eynan tur aña.
Tambe tin e servicio di bari y tene centro di ciudad limpi. Ta un limpiesa cu ta haci diariamente, hasta dos biaha pa dia, mainta tempran y atardi. Esaki ta na momento cu e negoshinan den Punda y Otrobanda cera. Nan tin hopi sushi cu nan kier deshaci di dje.
Tambe nan ta recoge e sushinan aki y tene e centro di ciudad limpi.
Esaki tambe ta un servicio colectivo y ta algo cu ta cobra gobierno p’e.
Tin tambe conoce e servicio di mantene careteranan limpi, mantene e barionan limpi. Pa esey tambe gobierno ta haya e cuenta.
Apesar di esey tin tambe e servicio caminda cu ta mantene e sistema di riolering funcional. Tin un sistema di basta meter di riolering y esey rato rato tin chens cu sa tin verstopping cierto camindanan, di tal manera cu e awa no ta fluctua. E ora ey ta remedia esaki y ta haci tambe mantencion preventivo na e riolering.
Basicamente esaki ta e servicionan cu ta haci pa gobierno. A base di esey tambe tin e acuerdo cu Gobierno, un beheersovereenkomst, caminda cu tin e servicionan aki delinea y e compromiso con ta haya nan pago.
