Ex Minister Paul Croes no por a evita su mal contento pa e forma con Ministerio Publico a trata cu e caso contra dje. Mas ainda treciendo dilanti mesa berde un comerciante cu el a yuda pasobra e tabatin mester di ayudo y e hecho cu e comerciante aki despues a coopera cu un proyecto social di e Minister pa e Stichting SONRISA.
E nomber aki ta Mario Arango Quinceno, pero kisas pa hopi e nomber no ta bisa nada, te ora cu bisa Don Jacintho. Den Corte e comerciante a splica cu e tin 23 aña bibando na Aruba, y con poco-poco el a lanta, cuminsando pa recogiendo sushi tur rond. Su prome intento pa drenta comercio a finalisa den un fracaso y el a bay Colombia.
Pero a bolbe pa bolbe haciendo intento bendiendo empanada te el a yega na habri e negoshi di cuminda, unda e doño a dune tres luna gratis di huur. Pero e negoshi a bira asina popular cu nan no tin man pa andando hende. Y no tabata haya empleado y esnan pa cual el a pidi permiso a wordo rechasa.
Asina el a drenta den contacto cu e Minister via di un otro persona y a splike e situacion dificil cu nan ta pasando aden, coriendo e chens di perde tur cos atrobe. “Esaki no por,” e Minister a conteste y a bis’e cu e lo bay mira kico e por haci pa nan. El a logra haya su permisonan y e negoshi a sigui draai.
Algun luna despues el a haya un invitacion pa un encuentro na oficina di e Minister hunto cu otro comerciantenan. Nan a wordo mustra un piramide pinta cu nomber di diferente proyecto cu fundacionnan mester. “Mesora e bista di mi sra a cay riba e nomber di SONRISA. E motibo ta cu mi señora tin un yiu special cu ta wordo cuida diariamente na SONRISA. Nos a wordo splica cu SONRISA mester di un cushina cu lo costa rond di 15 mil florin. Mesora mi contesta a contesta cu nos lo percura pa e 15 mil florin.
Ami no tabata di acuerdo, pasobra e ta hopi placa, pero mi casa a dicidi cu nos lo bay yuda.” Despues el a duna un splicacion con tur nan tabata kita cierto suma pone un banda te ora cu nan a cera e 15 mil florin. “Y durante un acto publico e suma aki a wordo entrega den presencia di e hendenan di SONRISA.”
Don Jacintho a splica cu esey no tabata e unico donacion cu nan a yega di haci.
Na momento cu Croes a bini na palabra el a bolbe bisa cu e ta sinti su mes “vernederd” pa con OM ta presenta e casonan aki. El a splica cu un proyecto cu su Ministerio tabati pa yuda Stichtingnan y asina den e prome aña a recauda 280 mil florin y den e di dos aña 230 mil florin pa yuda diferente stichtingnan ehecuta nan proyecto. Con por ta posibel cu OM ta conecta e bunita proyecto aki pa SONRISA cu un caso di soborno, Croes a bisa.
