Diahuebs durante dia a tuma un New Year’s Cocktail organisa pa Aruba Gastronomic Association, pa su miembronan.
Jan van Nes, presidente di e asociacion, a splica cu e encuentro aki ta uno cu normalmente nan tin durante e periodo di pasco, unda cu nan tin un Christmas Luncheon. Pero door cu nan tabata asina ocupa durante e temporada, a dicidi pa tene un cocktail pa desea otro feliz aña y tambe networking. Esaki ta reemplasa e evento di pasco.
Reunion
Van Nes a splica cu e ta un bon oportunidad pa reuni. Como AGA, ta tratando di bira mas y mas e voz di e industria di restaurant. Den e sentido ey a adapta nan busiNes plan aña pasa, riba marketing organization tambe ta uno cu tin e interesnan di e restaurantnan na pecho. Den e sentido ey, segun van Nes, tur tin e preocupacionnan y kier duna e miho servicio posibel. Den e luz eynan a topa recientemente cu gobierno pa wak si por yega na diferente solucion cu tin di haber cu labor, e falta di empleado. Te awor aki el a bay den un bon atmosfera.
Un voz na gobierno
E no ta nada straño den e industria aki, y na Hulanda ta pasa mesun cos. Falta hende pa traha. Mayoria di e restaurantnan y HORECA en general na Aruba, falta koki, falta waiter, falta bartender. Si bo kier yega na un x nivel di servicio, bo mester tin personanan cu tin e conocimento y desafortunadamente nos ta den un epoca unda cu hopi studiante di EPI, EPB ta scoge pa despues di nan estudio, di no sigui den HORECA.
Pero bayendo otro trayectorianan, tin gran dificultad di ocupa puestonan den HORECA cu tin di haber sea cu waiter, busboy, bartender, koki, aunke e puestonan ta paga bon.
