Resientemente “Plataforma HAVO/VWO” a keda instituí pa asina mehorá i garantisá kalidat di estudionan riba nivel HAVO i VWO na Kòrsou.
Esaki ta sali for di e punto di bista di e “Akuerdo di Gobernashon 2017-2021” i “Programa di Gobernashon 2017-2021” ku ta forma base pa realisá e máksimo potenshal di nos hóbennan. Gobièrnu di Kòrsou ta para pa formashonnan ekselente di nos hóbennan i pa tur mucha tin oportunidat pa forma nan mes segun nan máksimo potenshal.
Pa alkansá esaki, Minister di Enseñansa, Siensia, Kultura i Deporte (ESKD), sra. Marilyn Alcalá-Wallé a instituí e “Plataforma HAVO/VWO”.
E plataforma ta bai hasi evaluashon di e struktura di enseñansa di HAVO/VWO ku tin aktual pa asina por duna konseho pa hasi adaptashon na e maneho. Tambe e ta bai inventerisá riba e nesesidatnan ku tin den e kampo di enseñansa, ehekutá konsehonan i posibel solushonnan pa e retonan ku tin den enseñansa.
E plataforma ta konstistí di e siguiente representantenan:
Direktor di sektor “Uitvoeringsorganisatie Onderwijs en Wetenschap (UOW)”, direktor di maneho di Ministerio (ESKD), Inspektor General, direktor di “Expertisecentrum Toetsen en Examens (ETE)”, funshonarionan di enseñansa HAVO/VWO di Dienst Openbare Scholen (DOS), direktivanan di enseñansa partikular, rèktor di skolnan di HAVO/VWO ku ta wòrdu supsidiá dor di Gobièrnu i ekspertonan eksterno riba petishon.
