Corte a acepta tur e puntonan treci dilanti door di abogado mr. Jurney Tromp, y a declara e militar Kevin Fernando Vermeer liber di tur acusacion relaciona cu e accidente falta cu a tuma luga dia 14 di juli, 2023.
E accidente aki a sosode dia 14 di juli, 2023 den Havenstraat y unda cu Hawin ‘Hawa’ Ruiz a perde su bida. A hiba chauffeur di e otro vehiculo envolvi corte, pero e resultado di diahuebs mainta ta indica cu autoridadnan concerni no solamente a comete eror den investigacion pero tambe e falta di prueba a hunga un rol.
Por corda cu un luna despues di e sucedido ainda tabata busca testigo di e sucedido y awe a resulta cu corte no por a haci nada pa bay di acuerdo cu e peticion di e abogado pa declara e militar Vermeer liber di tur e tres acusacionnan.
Un di e erornan cometi ta cu no a envolvi marechaussee for di prome instancia. Hues a bisa den su sentencia cu como ta trata di un militar, mester a entrega e caso na marechaussee y haci uzo di leynan Hulandes.
Na di dos luga e aparato cu a uza pa chek alcohol no ta cumpli cu e reglanan (ley) di Hulanda. No tin prueba tampoco cu el a core “roekeloos”. E otro pregunta si e ta culpabel di e accidente, tampoco tin prueba di esaki, pa cual a declar’e liber di e acusacion di ta culpabel na un accidente fatal.
No tin nada di prueba pa mustra con e accidente aki a tuma luga. Esey ta motibo pa declar’e liber di e ultimo acusacion.
Ministerio Publico tin dos siman di tempo pa apela e decision.
