Camara di Comercio y Industria Aruba (KvK) a tene diamars 24 di april ultimo un evento organisa specialmente pa e empresario cu a caba di registra su negoshi e aña aki.
E idea tras esaki a origina despues cu The Lab y CATC a acerca KvK cu e sugerencia pa brinda e empresario nobo mas informacion y tools cu e por tin den su arsenal pa di e forma aki cuminsa su negoshi cu un base mas solido.
KvK ta mira e importancia pa por brinda e empresario tur loke e tin mester y di e forma aki a crea un programa pa e anochi caminda e empresarionan nobo a wordo invita. E evento aki ta posibel danki na e aporte di tur e oradornan y tambe sponsor Pepia Est cu a trece diferente biña pa acompaña e session di networking di e anochi aki.
E intencion di KvK ta pa organisa e evento aki mas frecuente pa aña y invita empresario cu recien a registra su prome negoshi. E empresarionan cu a atende e evento a aplaudi e iniciativa y a haya e informacion cu a wordo presenta sumamente valioso. Ademas a haya e oportunidad pa crea miho contacto y haci preguntanan relaciona cu diferente aspecto di haci negoshi cu esnan presente.
Directora di KvK, sra. Sonja Velthuizen a hiba palabra di bon bini sigui pa sr. Ernst Mohamed, Presidente di Directiva di KvK.
Durante e anochi a duna diferente presentacion di interes pa e empresario: Qredits a duna informacion encuanto financiamento; CATC a splica encuanto administracion di negoshi; The Lab a elabora riba marketing y social media; Departamento di Impuesto a discuti e topico di impuesto pa negoshi y Sagicor Life Aruba a trece dilanti e importancia di seguro.
Den e auditorio tambe tabata presente algun companianan cu nan booth pa brinda mas informacion na e empresario. Asina por menciona: Action Coach; Juju Events; Pepia Est; HFT Treasury & Accounting Services N.V.; Manrique Capriles y Qredits.
E empresarionan a elogia e evento y a keda hopi agradecido cu e oportunidad unico aki di ricibi informacion y crea lasonan comercial cu sigur lo yuda nan den nan empeño comercial.
KvK ta pone pa organisa e evento aki mas frecuente pa aña banda di su eventonan di Business Plaza cu e intencion di yuda tur comerciante segun na ki etapa nan por ta cu nan negoshi. Pa mas informacion por tuma contacto tambe via e-mail: [email protected] of yama nos na: 582-1566, ext. 27/30/35/42.
