Awe mainta Corte mester a trata e caso contra Alberto Roberto Laveist, kende a hay’e cu un citacion, pasobra nan ta bisa cu el a viola ley di Calamidad. Esaki ta nifica cu el a tuma pisca for di un otro nave cu tabata den awanan teritorial di Venezuela.
E acusado mes ta malo cu keintura pa cual su abogado Gabri de Hoogd di e oficina James Martin & Associates, a pidi hues pa pospone tratamento di e caso pa su cliente ta presente, pero tambe pasobra nan tabatin dos peticion na Corte.
A acusa Laveist di viola Ley di Calamidad riba 28 di augustus 2020 dor di haci contacto den of pafo di awa teritorial di Aruba cu un of mas boto di otro pais pa carga mas cu 600 kilo di pisca riba su boto. E ta wordo acusa di a drenta Aruba cu pisca sin permiso di Havenmeester riba 28 di augustus 2020.
Tambe ta acus’e di viola Ley di Calamidad riba 5 di september 2020 dor di haci contacto den of pafo di awa teritorial di Aruba cu un of mas boto di otro pais pa carga casi 600 kilo di pisca riba su boto. E ta wordo acusa di a drenta Aruba cu e pisca sin permiso di Havenmeester riba e fecha menciona.
Debi cu e abogado a pidi pa inclui imagennan di radar den e dossier y scucha dos testigo, a pospone tratamento di e caso. Otro siman diahuebs tin decision riba e peticionnan haci.
Pa mas informacion, lesa TREMPAN.
