Resientemente Democraat a tuma nota di un konsternashon ku a surgi despues ku kolaborador di minister di Hustisia, señor Rigo Thodé, durante un reunion ku sindikato ABVO, a ekspresá su mes ku mester “kue lidernan sindikal sera”.
Esaki ta algu inakseptabel i tin tendensia di diktadura den un pais manera Kòrsou kaminda mester respetá demokrasia, derechi di welga i salbaguardiá nos estado di derechi.
Ku rason diferente lider i èks lidernan sindikal a reakshoná formalmente na un matutino pa rechasá i kondená e ekspreshon hasí aki.
Partido Democraat ta kere den libertad di ekspreshon pero tin límite i e ekspreshon hasí pa e kolaborador di minister di Hustisia ta bai kontra di tur regla di desensia i ta mina nos estado di derechi i ta duna señal di diktadura.
Ademas no ta promé bia ku ministernan di e gabinete aki ta mustra tendensianan diktatorial. Nos tur ta kòrda e famoso karta di e Minister di Salubridat, Pietersz-Janga, pa para proseso den korte, ku por sierto e karta ta riba mesa ainda, apesar ku Parlamento di Kòrsou a duné un moshon di desaprobashon pa a manda e karta konserní.
Democraat anteriormente a señalá e kosnan aki i a konsehá Promé Minister pa asumí su responsabilidat en bes di permití ku ta keda tacha nos estado di derechi i tambe ku e tin ku hañ’é kada bes ta keda paga kandela.
Ta bin aserka ku Democraat a urgi nos Promé minister pa atendé e echo ku ainda no tin un minister di Hustisia ku por atendé 100% ku e kartera asina pisá aki. E konsekuensianan ta bisto tur dia di nobo.
Por último, Democraat ta urgi nos Promé Minister pa asumí responsabilidat den tur sentido i den e kaso aki, komo Minister di Hustisia, laga koregí e ekspreshon hasí dor di su kolaborador.
