Dia prome di maart 2021 e gobierno forma pa e partidonan MEP, POR y RED Democratico a vota p’e codigo civil unda e geregistreerd partnerschap a drenta na vigor dia prome di september 2021. Un total di 17 parlamentario a vota na fabor pa introduccion di e geregistreerd partnerschap. E mesun luna, esta dia 30 di maart 2021, gobierno a bay cas. E tempo ey e politiconan di tur color politico a traiciona e pueblo Cristian. Durante campaña nan ta bin cu yen di promesa falso pa despues traiciona e pueblo Cristian y mas tristo ainda cu ayudo di e pastoornan Cristian cu a dividi e pueblo Cristian pa vota sea pa partido MEP of partido AVP.
Dia 4 di maart 2024 parlamento ta vota pa trece cambio den nos codigo di procedemento criminal. E strafvordering bieu pa detencion den cel na warda di polis tabata un total di 10 dia. Den esun nobo el a bira 20 dia. Partido Curpa no por compronde dicon no a laga e parti bieu, esta e 10 dianan, keda manera cu e ta. E motibo pa cambia e ley ta obvio. For di hopi tempo ta conoci cu tin problema cu e celnan na KIA pa cera hende. E gobierno aki mescos cu esun anterior no a haci nada pa trece un solucion duradero.
Awor cu otro baca a hoga ta dicidi pa cambia e ley cu basicamente ta contra derechonan humano y ta bolbe haci otro promesa mientras ta traha pa bin cu un solucion. Nos conoce e modus operandi di e gobierno. Priminti y nos no ta cumpli pasobra pueblo ta lubida lihe. Nos conclusion di tur e problema nan aki cu dia tras di dia ta escala ta, cu no tin placa. E placa ta pa biaha so, pero no pa pone man na obra. Mira e problema di Bubaliplas, dump tur caminda, nos careteranan na werki y asina nos por mustra hopi mas cos cu no tin solucion.
Nos sa cu e fin di gabinete Wever Croes II ta na porta. Nos prome minister a firma cu Common Trust Network dia 17 di december 2020 cu ta forma parti di World Economic Forum. Nos minister di economia y Sustainable Development Goals tin e implementacion di agenda 2030 bao di su encargo. Minister president ta firma y minister di Economia y Desaroyo Sostenibel ta implementa. E agenda aki a cuminsa bao di gobierno di partido MEP sigui pa partido AVP y awe bao di e gobierno aki.
Si nos analisa e diesshete puntonan di e agenda 2030 tin dos aspecto cu partido Curpa kier resalta. Na prome luga punto cinco cu ta encera igualdad di genero loke lo hiba na matrimonio di mesun sexo. Punto shete ta papia di clean energy. Si a bay di acuerdo pa implementa e diesshete puntonan anto ta mas cu logico cu ni partido MEP ni partido AVP por bay contra di e punto 5 y 7. Esaki lo tin como consecuencia cu e matrimonio di mesun sexo lo ta introduci door di parlamento y cu no lo tin espacio pa reapertura di e refineria paso e lo ta contra desaroyo di punto 7 cu ta energia berde.
Esaki mester habri wowo di pueblo hancho cu no tin awa pa laba cu e gobierno y parlamento actual. Nan lo firma bij het kruisje. Por ta esaki ta e motibo cu partido RAIZ ta urgi Presidente di Parlamento pa atende e matrimonio di mesun sexo awor caba prome cu haya reaccion di cassatie y ta fomenta contra e esfuerso di e Minister di Energia cu kier admiti exploracion di gas y crudo. Partido Curpa ta di opinion cu locual cu Minister di Energia ta haci ta tira santo den wowo di pueblo.
Aruba mester di un cambio den gobernacion y ningun partido politico por trece e cambionan aki, pasobra nan ta e causante di e desastre cu nos pais ta biba aden. Ora bo separa estado for di religion bo ta habri porta pa corupcion. E situacion desastroso cu nos pais ta actualmente aden solamente cu sabiduria di Dios nos lo hiba nos isla padilanti. Si nos gobierno no tin respet pa leynan di Dios nos isla no por haya e bendicion di Dios.
Dios su man ta ariba nos isla pa causa di e cristiannan cu ta honra Dios. Si Aruba hala for di su mal caminda y pidi Dios pordon di curason nos isla lo ta bendiciona. Sin arepentimento no tin bendicion. Bo no por papia di Dios y bo ta brasa satanas. Esaki ta haci cu partido Curpa ta e unico alternativa.
