Parlamentario Arthur Dowers (AVP) a reacciona loke a bin dilanti riba programa di Enfoke. “Lamentablemente mi no conce e grupo aki di ta presta nan mes asina. Mi a mira sra. Gerlien Croes sinta eynan y no ta prome biaha el a hiba informacion incorecto.”
Ayera a pretende cu partido AVP cu MEP lo a join pa aumenta e detencion di personanan na warda di Polis. Dowers ta bisa esaki ta un mentira. Tambe ta papia cu AVP a sostene, apesar cu tur otro fraccion y parlamentario a sostene fuera di Gerlien Croes. Cu pa motibo cu AVP a sostene e ley cu esaki a pasa. “Tambe ta un mentira,” Dowers ta expresa.
E parlamentario ta bisa cu e ley aki tabata tin dies hende di gobierno cu a sostene, un di nan no a vota cual ta un cos cu nunca a yega di mira segun Dowers, y ni presidente di Staten a reacciona riba esey. “Tabata tin menos hende cu ta sostene gobierno cu si nos no lo a vota mes e ley lo a pasa. Kiermen no ta berdad cu e ley aki a pasa pa motibo di AVP.”
NO TA FIN DI MUNDO
Dus no ta asina cu ta fin di mundo y AVP cu MEP a bini hunto pa maltrata hende den cel di Polis via di un ley pa cera nan mas dia. “Si tabata cu nos lo cera Evelyn den un cel, e ora nos lo a bisa si.” Dowers ta bisa cu e pensamento cu e lo uni cu Rocco Tjon pa pais Aruba, “absoluut niet.”
E parlamentario ta bisa cu loke Patrick Paskel a presenta durante su programa riba e tema aki no ta al caso. Si lesa e carta di Orde van Advocaten, ningun caminda ta para cu AVP cu MEP a join pa cera hende, ta lamenta profundamente e comosion cu a keda crea, cual a crea un avalancha di yamada pa Dowers riba hende pensando cu el a join cu MEP. “Hamas e lo pasa.”
