Den un forma hopi sincero y di curason e participante di Miss Aruba Online 2021 Eunice Albertsz awe ta comparti su propio experiencia cu salud mental, cu e meta pa normalisa cu bo por papia si bo ta sinti un desbalansa den bo salud mental.
Awendia e ta full normal pa bisa cu bo tin dolor di cabes, griep of si bo tin cualkier otro problema fisico sin mester sinti berguensa. Lamentablemente si un persona bisa cu e ta sinti cu e mester ayudo cu su salud mental, hopi lihe por haya comentario manera: “Ta loco bo ta?” “Bo cabes ta bon?” “Ta stress bo tin, haci algo cu bo ta gusta pa e kita”. Tur e comentarionan aki ta causa cu un persona ta sinti berguensa pa papia di su salud mental y como consecuencia no ta busca ayudo cu ta disponibel na Aruba.
Eunice ta comenta: “Ta ora pa normalisa y papia di Salud Mental. Esaki ta djis e prome paso, mi ta spera cu mi storia lo habri e caminda pa normalisacion. E no ta facil, mi sa, e ta tuma curashi, pero nos mester yuda otro. Sin ayudo y apoyo e situacion no lo cambia.”
Como parti di Challenge #3 di Miss Aruba Online 2021 “Mi Causa” Eunice lo lansa un Plataforma unda cu esnan cu kier mira testimonionan manera di Eunice y/of tambe kier comparti nan propio testimonio lo por bishita.
Dia 31 di maart 2021 e website nobo aki lo habri. Eunice ta invita tur hende pa bay na e Instagram di Miss Aruba Online “missaruba_online” y/of e Facebook Page “Miss Aruba Online” pa por haya acceso na e plataforma nobo.
