Recientemente Monumentenbureau a celebra su 25 aniversario. E departamento a bay Misa na unda pastoor di Misa di Oranjestad a bendiciona cada empleado. Alabes a bay un reunion cu nan Minister di Cultura Mr. Xiomara Maduro na unda a celebra e aniversario.
Historia di Monumentenbureau
Gobierno a institui riba prome di januari 1996 por medio di un decreto gubernamental un Bureau cu a haya e nomber Monumentenbureau. A cuminsa traha den un espacio chikito den Centro Educativo Cristian y despues di un luna a muda na Maria Convent den e hala na Dominicanessestraat. Monumentenbureau a cuminsa crece y na juni 1997 a muda pa Zoutmanstraat 1 pa despues na 2001 a muda pa Schelpstraat 36-38 na unda e departamento ta ubica te ainda.
Den transcurso di aña e departamento aki a crece y asina tambe nan tareanan. Na 1996 Monumentenbureau tabata tin tres persona den servicio. Na 2013 a haci restructuracion y el a bira un departamento y su formacion a crea 15 funcion. Actualmente tin 11 funcion yena y tin 4 vacatura. E cambio grandi na 2013 tabata cu e departamento mes a cuminsa pinta mapanan di restauracion y Monumentenbureau mes ta haci e direccion y supervision ora e proyecto bay pa ehecucion.
E departamento a conoce diferente minister bou di cual nan a resorta: dr. L. Beke-Martinez, Ramon Lee, Michelle Hooyboer-Winklaar, Orlando Oduber, Mr Mike Eman y e actual minister Xiomara Maduro. Monumentenbureau tin un solo director desde 1996 te cu awor kende ta Ing. Yvonne Webb-Kock.
Tareanan di Monumentenbureau
E tareanan di Monumentenbureau ta encera; compila norma y criterio pa proteccion y e proceso di proteccion, haci estudio y investigacion, guia tecnico pa restauracion y lidera su ehecucion, pinta mapa, controla permiso, maneho di gobierno, informacion y promocion di monumentonan, etc.
E prome proyecto cu Monumentenbureau a guia tabata restauracion di e Stadhuis. E proyecto aki a cuminsa na 1996 y e edificio tabata propiedad di gobierno. Despues di a termina e restauracion na 1998, gobierno a traspasa e edificio pa fondo di monumento. Un otro proyecto interesante cu Monumentenbureau a guia tabata e edificio cu tabata situa band’i banco den Caya Grandi y cu a transporta esaki pa Weststraat. Esaki a sosode na 2000 y ta despues di shete aña di e restauracion a pasa e edificio pa fondo di monumento. Proyecto di e compleho monumental mas grandi tabata esun di Ecury. E tabata un proyecto cu a tuma hopi aña pa wordo realisa. Corte tambe ta un compleho na unda Monumentenbureau a haci alabes acerca e interior y siguridad. Cas Ceremonial di Gobernador tambe tabata un proyecto cu Monumentenbureau a ehecuta.
E departamento a duna hopi atencion pa educa alumnonan y a duna les na tur scol basico y secundario y tambe na universidad. Directora tambe a educa varios maestro na Aruba, Corsou, Bonaire y Sint Maarten cu educacion riba nivel di masters den e materia di arkitectura di Aruba. Monumentenbureau sa organisa e Paseo Monumental cada aniversario, pero lamentablemente covid-19 a haci esaki imposibel pa organisa e biaha aki pa celebra nan 25 aniversario. A haci inventarisacion di tur monumento y actualmente ta efectua y documentando tur informacion automatisa di cada monumento.
Restauracionnan y mantencion cu ta andando actualmente ta e proyecto di oficina di DRH, e interior di ex Laboratorio pa DVG y e mantencion hopi grandi pa e compleho di Corte.
Monumentenbureau en conexion cu nan di 25 aniversario lo comparti informacion via su Facebook page “monumentenbureau” y lo comparti informacion general manera kico ta un monumento, kico ta e rekisitonan pa un permiso, cuanto monumento ta protegi, kico ta un monumento A y kico ta un monumento B, etc
Monumentenbureau kier a haci uzo di e oportunidad aki pa gradici nan minister Xiomara Maduro pa tur su apoyo cu ricibi. Tambe Monumentenbureau kier gradici Monumentenraad, ex coleganan y tur otro departamento di gobierno pa e colaboracion ricibi, arkitectonan y nan consehero, companianan di construccion y nan subcontratistanan y tur cu a contribui den nan manera na Monumentenbureau.
