Nigel Maduro ta un cientifico den sostenibilidad y activista ambiental cu ta lucha contra neo-colonialismo y e degradacion di e medio ambiente na Aruba. Maduro ta busca manera pa conscientisa riba e impacto di neo-colonialismo riba e islanan di Caribe Hulandes y ta resalta e importancia di un enfoke sostenibel pa preserva e medio ambiente.
Como activista, Maduro ta splica cu colonialismo ainda ta persisti riba e islanan y aunke Reino di Hulanda mester representa Aruba, Boneiro, Corsou y e otro islanan den acuerdo internacional, esaki hopi biaha ta ignora. Pa Maduro, e falta di representacion aki ta un forma di neo-colonialismo.
Maduro ta comenta riba e sistema di gobierno cu ta sigui ignora e historia y e necesidadnan di e islanan.
E ta destaca cu colonialismo tambe ta refleha e falta di accion n’e cambio climatico. A pesar di ta parti di Reino di Hulanda, e islanan ABC-SSS no ta adecuadamente representa n’e convencion internacional riba Cambio Climatico.
P’e activista, esaki ta un indicacion cla cu e preocupacionnan ambiental di e islanan no ta un prioridad p’e gobierno Hulandes.
MANIFESTACION RIBA DIA DI REY
Si nos bay bek riba diasabra ultimo, durante e acto protocolar na ocasion di Dia di Rey, nos por corda cu tabatin un multitud basta grandi di activista y mayoria di nan hoben, cu a bin protesta.
Maduro a señala cu e agresividad policial den direccion di e activistanan ta aumentando. E intimidacion y e uzo di forsa contra e manifestantenan a bira mas frecuente. “Nos a graba video cu ta mustra con polis ta ataca nos. Nan ta intimida nos, ta pusha nos, ta uza palabra sushi,” el a describi. E reaccion agresivo di autoridad ta un violacion cla di e derechonan constitucional di e ciudadanonan y ta crea un ambiente di miedo pa esunnan cu ta desea di protesta pacificamente.
Sinembargo, a pesar di e desafionan aki, e movemento ambientalista ta creciendo. Segun Maduro, cada biaha mas hende ta uni pa sostene e causa, cu manifestacion mas frecuente y un mayor presencia riba e rednan social. Maduro ta menciona cu e protestanan reciente a reuni hende di tur edad, pero e mayor apoyo ta bin di e generacion mas hoben. “E generacion hoben aki, nan ta esunnan cu lo bay sufri cu e consecuencianan di e mal decisionnan,” Maduro a bisa, refiriendo n’e cambio climatico y e perdida di e recursonan natural na Aruba.
Maduro a enfatisa cu e defensa di medio ambiente no tin un colo politico. “No ta importa si bo ta berde, geel of di cualkier otro colo. Nos tur ta biba riba e isla aki. E ta nos cas, nos legado. Nos mester lucha p’e. Si nos no bringa p’e, dimes nan lo bende. No tin di haber cu politica,” el a adverti. P’e, activismo ambientalista ta bay mas leu di cualkier gobierno en particular, ya cu sostenibilidad ta un problema cu ta afecta nos tur.
E activismo di Maduro tin como obhetivo garantisa un futuro sostenibel p’e generacionnan venidero. E presion constante riba autoridad ta busca manera pa lanta e conscientisacion di e necesidad pa actua awo pa evita un daño ireparabel n’e medio ambiente. Mientrastanto e movemento ta sigui crece, reuniendo mas hende pa proteha e medio ambiente y combati colonialismo. “Nos ta bay sigui lucha te ora cu e medio ambiente ta un prioridad,” el a indica.
NO TIN DI HABER CU POLITICA
E movemento aki, protehando naturalesa ta surpasa e historia di politica na Aruba. Nos semper tabata defende naturalesa, nos semper tabata biba cu naturalesa. Awo pa bo hacie politica, come on. Bo ta haciendo e algo cu e no ta. E ta mas cu esey. E ta surpasa e historia y tambe protehando naturalesa ta mas importante cu politica. Dus, e no tin nada di haber cu cua gabinete ta sinta, cua gobierno ta manda. No ta importa. Ken cu ta lo haya presion. Desafortunadamente aworaki MEP y RAIZ ta den gobierno y nan ta haya e presion. Si AVP tabata den gobierno nan tambe lo a haya e presion. Ken cu sinta eynan nan ta bay haya stem di Aruba amplifica y mas presion ta bin riba nan.
Esaki ta pa e generacionnan futuro, cu ta bay biba tur e mal decisionnan tuma. Segun Maduro, esey ta un bon cos pa trece dilanti tambe. E generacion hoben, esunnan cu ta bin despues, nan ta bay sufri, nan ta bay sinti e efectonan mas grandi di kico ta pasando na Aruba. Ta birando mas calor. Lama ta bezig ta subi tera. Nan no por ni cumpra tereno rond di Aruba. E generacion mas hoben cu Maduro mes, lo sinti e efectonan mas duro. Eynan tambe por mira cu e generacion prome cu Maduro, no a lucha suficiente y esey ta loke Maduro no kier p’e siguiente generacion. E lo lucha p’e siguiente generacion. Esey ta sostenibilidad. Esey Maduro ta mira cu si mira den e protestanan tambe, nan tur ta hende hoben. Mayoria di nan ta hende ta Gen Z of Millenials. “Bo ta wak cu nos futuro ta wordo perhudica,” el a comenta. E ta birando mas grandi y esunnan hoben tambe ta cuminsa para. Esey ta loke ta hacie mas fresco. E hendenan tambe ta bay ta manera, “OK, cambio.” Pasobra e hendenan hoben ta para pa Aruba. Mientras cu e generacion mas bieu no a haci esey p’e generacion hoben. E ta bay sigui bira mas grandi cu e generacion hoben tambe, pasobra nan futuro ta na riesgo, Maduro a enfatisa.
