Pa di dos biaha ladronnan a kibra trankilidad di un comerciante cu un establecimento comercial na Tanki Leendert. Den oranan di marduga alarma a cuminsa zona na e negoshi di You & Me den e bario menciona.
E hendenan mester a drenta e luga rond di 2’or di marduga ora cu e compania di seguro a haya señal di alarma cu un persona a drenta e negoshi pa cual mesora a yama e doñonan y informa nan di e sucedido.
Nan a kibra porta di e negoshi y a bay cu trahenan di baño y otro trahenan di hende muhe. Loke ta straño cu tur esaki a sosode den Toque de Queda.
E persona a drenta y den un minuut el a “shop”. Na momento cu el a sali e alarma a zona. Tabatin un patruya hopi cerca cu mesora a yega na e sitio, pero ya caba e ladron a bandona e sitio cu su mannan yen.
No ta prome biaha cu e ladronnan a drenta e negoshi. Esaki a sosode anteriormente na 2017. “Ta hopi lamentabel pasobra Aruba ta pasa den situacion duro. Y comerciantenan no tin’e facil, pa awo ladronnan bin causa daño asina . Y no ta papia solamente di perdida di material pero gastonan pa drecha e destruccion cometi pa drenta e luga. E ta hopi tristo.”
El a haci un apelacion na tur ciudadano pa mira e video y yuda pa haya e ladron. No ta importa pa haya e mercancianan bek, pero mester gara e ladron. “Ban yuda otro. Si wak algo sosode cu no ta corecto, ban yama polis y yuda den situacionnan asina. Dia pa dia ta haya mas insiguridad na Aruba.”
E ladron a kibra e porta, cu mester drecha completo. Ta gastonan cu nan no a calcula riba dje. Loke el a haya straño ta cu e alarma no a zona for di prome momento cu e ladron a dal den dje sino te ora cu el a sali. “Mi ta tuma tur precaucion. Mi tin security y camera. Mi no ta laga placa eyden y toch ta bira victima di ladronnan.’
