Despues di kasi 10 aña di negoshashon pero ku un vishon i meta konsistente, e minister di Ekonomia di e tempu ei i aktual promé minister di Kòrsou sr. Eugene Rhuggenaath, den 2017 a konkretisá e aliansa pa kontinuashon di Kòrsou su Dòk huntu ku DAMEN, awe DAMEN SHIPREPAIR CURACAO.
E union aki a perkurá di krea oportunidat pa e.o. nos hóbennan adulto bira supervisor, groepleider, projectmanager i di e forma aki fortalesiendo formashon di nos mes hendenan. Mas posibilidat a keda krea pa invertí den profeshonalnan nobo lokal ku garantia di un trabou duradero.
Aserka ta bini ku riba plano internashonal Kòrsou a haña mas rekonosementu i mas trabou a kuminsá bini den direkshon den nos Dok. E ekspanshon ku e 2 dòknan flotante di 230 meter i e otro di 120 meter ku lo yega Kòrsou medio aprel ta e prueba palpante ku kompanianan grandi i di rekonosementu internashonal ta kere den nos Kòrsou i den nos yunan di tera.
Gobièrnu di Kòrsou, en partikular e ministerionan di Tráfiko, Transporte i Planifikashon Urbano i e ministerio di Desaroyo Ekonómiko, a traha huntu pa konkretisá e logro grandi aki.
Laga nos tur sigui konfia i invertí den e potensial di nos Kòrsou pa nos keda úniko den Karibe.
