Dialuna ultimo, durante un ecuentro ameno, a reuni cu presidente di Kiwanis Club of San Nicolas, Endrah Richardson-Gumbs y cu vice- presidente Joanette Vrutaal. Presente na e ocasion aki tabata Minister Presidente Evelyn Wever- Croes y Minister di Enseñansa y Deporte Endy Croes. Na luna di januari ultimo Kiwanis Club of San Nicolas a cumpli dos aña sirbiendo comunidad y ta conta cu un total bintinuebe miembro activo.
Durante e reunion Richardson – Gumbs a conta di e historia di con a funda e club y e bunita proyectonan cu Kiwanis Club of San Nicolas ta haci na bienestar di muchanan y comunidad general di San Nicolas. E club ta forma parti di Kiwanis International cu ta un organisacion global di boluntario dedica na mehora mundo via mucha y via di comunidad. Nan lema ta ‘sirbi e muchanan di mundo’.
Durante e reunion a presenta e ultimo proyecto di e club cu ta ‘Smile Drive’. E proyecto ta encera cu si bo cumpra un tumbler, e contribucion ta bay pa un mucha por bishita dentista pa haya su saneringsbrief y despues e mucha por drenta den sistema di AZV. Ban yuda nos muchanan di menos recurso, pa tin un bunita smile.
Tambe a elabora cu Kiwanis Club of San Nicolas a ‘charter’ un club di servicio pa hoben na Filomena College MAVO, conoci como e ‘Builders Club Filomena College’. Nan ta siña e hobennan, entre otro, di e importancia pa traha den ekipo, duna bek na comunidad y liderazgo. Pronto lo tuma luga e instalacion oficial di e miembronan y directiva di Builders Club Filomena College.
Parlamentario Alvin Molina ta gradici e miembronan di Kiwanis Club of San Nicolas pa e bunita trabou cu nan ta eherce y pa e amor y pasion pa sirbi e muchanan di San Nicolas. Alabes e ta felicita nan cu e club nobo pa nos hobennan y ta desea nan exito cu proyecto di ‘Smile Drive’.
