Durante bishita di Secretario di Estado, Alexandra van Huffelen, diamars mainta na Bestuurskantoor, el a haya habon regalo for di Prome Minister Evelyn Wever-Croes. E mandatario Hulandes a reuni tambe cu tur minister di Conseho di Minister. E set di habon cu el a haya regalo ta di e compania local Ha-Bon.
Na entrega di e regalo, Prome Minister a splica cu esaki ta un gesto simbolico di ‘social entrepreneurship’. E habonnan aki ta wordo traha door di personanan cu un of otro limitacion. E forma con ta envolve personanan cu limitacion den comercio, ta hopi aprecia pa Prome Minister y ta bunita pa mira cu Secretario di Estado van Huffelen tambe ta comparti e aprecio aki.
Secretario di Estado Alexandra van Huffelen ta na Aruba pa su prome bishita di trabou den su funcion nobo, pero su di dos bishita na nos isla. El a tuma e funcion over for di Raymond Knops. E ta keda Aruba dos dia pa despues sigui cu su biahe pa Sint Maarten.
