E diadomingo mainta di awe 25 di juni 2023 ta uno cu lo pasa pa historia mirando cu ta pa prome biaha cuater atleta cu limitacion fisico a participa den un magno evento deportivo na Aruba. E atletanan Casiene Tromp, Disjonrick Jacobs, Edgar Ridderstap y Rechenel Statie a engrandece e triatlon internacional na Aruba. Pa 6.25 di mainta, Glennon Eights di Aruba Triathlon Association a duna e señal di salida pa asina e atletanan inicia cu e parti di landamento pa despues core bicicleta y finalisa esaki cu e careda na pia. Mas cu claro cada uno tabata tin un acompañante y/of coach cu a guia of participa cu nan den e evento.
Completando e triatlon, tur atleta y coach a dicidi di bini hunto e recta final y aki sin duda e tabata un momento cu hopi presente no por a contene nan lagrimanan. E emocion riba cara di cada uno tabata bisto.
No por keda sin duna danki na Brainer Lampe, Gerald Moreta, Giandrick Lacle y Nigel Croes kende awe tabata nos heroenan cu a acompaña nos para-atletanan.
