No ta usual pa e dos minister y dos parlamentarionan di Raiz reuni diadomingo anochi te laat na cas di e lider, Ursell Arends na Sabana Blanco. Aunke nan no kier dun’e motibo, ta obvio cu e ultimo desaroyonan den coalicion tabata topico riba mesa. Mester habri siman cu claridad ki direccion ta tuma pa futuro di gobernacion.
Echo ta cu diahuebs ultimo Minister Ursell Arends a bay Embassy Suites cu su abogado pa exigi pa para trabou di creacion di un beach cu no ta existi awendia. Ora el a ripara cu e no tin e autoridad, el a manda un carta pa Prome Minister exigi pa e para e trabounan. Ora cu el a sinti cu esey lo no sosode, pa midi forsa, el a dicidi di entama un caso sumario hunto cu Aruba Birdlife Conservation di su amigo Greg Peterson, contra su mesun Gobierno y colega Evelyn Wever-Croes y contra e inversionista desaroyado Natura Development. Diabierna mainta a logra haya un “ordemaatregel” di hues pa para e trabounan mesora basa riba e permiso cu e mesun Minister di Infrastructura a duna algun dia pasa.
E strategia di Minister Ursell Arends pa bay corte, pa colmo uzando e mesun abogado cu Aruba Birdlife Conservation contra su mesun colega di coalicion, no a cay den bon tera. Separa cu huridicamente ta imposibel pa Gobierno keha su mes, e ta demostra un desconfiansa den coalicion y cu nan no ta capas of no ta confia otro pa regla problemanan na mesa.
Diadomingo anochi, despues cu Prome Minister a exigi clarificacion publicamente di Minister Arends, el a sali aclaria cu e lantamento di caso contra Evelyn Wever-Croes tabata un eror. Mas bien e kier a uza su poder pa exigi hues pa para e ampliacion di e beach pasobra segun e, cu Natura Development no ta teniendo nan mes na e condicionnan mara na e permiso. Un permiso duna na 2019 pa Embassy Suites y Divi Phoenix traha nan beach pareu.
Pero despues di esey, emocionnan a bay halto den seno di ambos partido, tanto den MEP como den seno di e junior partner, esta Raiz. Nan a yama un spoedberaad na cas di Minister Arends pa sigura cu tur hende ta riba e mesun liña. Na final niun kier a contesta preguntanan di 24ora.com cu tabata para pafo wardando e reunion finalisa. E caranan y e expresionnan no a parce cu tabata un reunion mucho placentero. Ta parce cu siman lo habri turbulento politicamente, net den e siman cu kier purba pasa e leynan pa revisa impuesto di entrada y reforma fiscal cu introduccion di BBO na frontera.
Tai Foo Lee & Ursell Arends a funda Partido RAIZ dia 9 di juni 2017. Lider desde fundacion ta Ursell Arends y a participa dos biaha den eleccion, na september 2017 y juni 2021. Record maximo di voto: 5481 (2021) y record minimo di voto: 2107 na 2017. Ideologia di Partido RAIZ ta social democrata, progresivo y liberal.
