E bisiñanan tur a uni pa purba scapa un cacho na Kurimiauw. E cacho tabata pasa di porta pa porta tur na sanger pa purba haya atencion. E bisiñanan a cuminsa preocupa y a busca manera di yega na e doño di e cacho na Kurimiauw 4.
Luga di tabata bon ricibi esunnan na e cas di Kurimiauw 4 mas bien a sali cu un actitud menasante contra e bisiñanan preocupa pa e cacho den necesidad di yudansa. El a hasta bisa bisiña cu si nan mishi cu e cacho, ta mira kico ta bay pasa. Dado momento ora a mira cu no tin manera pa yuda, e informacion hasta a yega na oido di minister Ursell Arends y tambe polis. E mandatario a bin den e bario pa mira e situacion di e cacho. Polis tambe a bin mira e situacion di e cacho cu a busca refugio na cas di un di e bisiñanan.
Djey polis a bay na e adres y atende cu e doño. Polis no por a saca masha positivo for di e doño di e cacho Husky. Mesun cabesura ta loke e doño tabata tin cu e polisnan. Hasta a mustra e doño cu e mester ta mas responsabel cu su mascota. El a bisa e polisnan cu e no lo haci nada pa yuda e cacho y esun cu kier ta liber pa haci’e. Polis a informa e bisiñanan cu a uni den bario wardando un contesta.
Finalmente cu e noticia di polis, e bisiñanan a logra hinca e cacho den un auto marduga. A avisa Veterinario na Noord y djey hiba e cacho. Na yegada a haci tur e testnan necesario y duna e cacho antibiotica. E bisiñanan mes a carga tur e gastonan. Djey banda di 2:00 am a logra sali for di Veterinario y hiba e cacho na un bisiña unda el a drumi paden bou vigilancia. Mainta tur bisiña a cuminsa puntra pa e cacho. Finalmente e situacion di e cacho a bira pio y el a fayece mainta.
Un otro negligencia di otro doño di cacho cu sabiendo con malo su cacho tabata, tog a nenga pa hiba e mascota pa ayudo medico. E polisnan a haci un anotacion completo di henter e situacion y a keda di bay atende di nobo cu e persona sin curason pa bestia. E bisiñanan a uni placa pa paga gastonan medico y tambe a zorg despues pa e cacho haya un luga adecua pa sosega pa semper. E bisiñanan a carga speransa cu e cacho lo sobrevivi.
Sinembargo nan a yega laat y e cacho finalmente no a sobrevivi henter e proceso despues di marduga. E cacho for di trempan tabata saca sanger for di nanishi y tabata move di cas pa cas pidiendo atencion. E prome pa yuda mester tabata su doño cu a tuma un actitud hopi mahos contra un cacho di dje mes cu tabata malo. Luna Foundation tambe ta den e chatgroup di e bisiñanan y tambe a duna conseho na momento cu e problema di e cacho a presenta.
