Recientemente Fundacion Aruba One Happy Island Lions Club hunto cu Friends of Lions a organisa e prome “Tayo riba Mesa”, pa aña 2024. Esaki ta un proyecto den cuadro di e programa di Lions International “Hunger Relief”, caminda danki na e sosten di comunidad y Friends of Lions ta yuda famianan den necesidad.
Riba e diasabra di e evento un total di 522 persona procedente di famia di menos recurso a ricibi nan cuminda di merdia te na nan porta di cas. Esaki tabata posibel danki na e cooperacion y contribucion ricibi di amigonan comerciantenan, boluntarionan di Cruz Cora, boluntarionan di Fundacion Pa Nos Comunidad, amigonan Lions, y Miembronan Aruba One Happy Island Lions Club.
Pa medio di e comunicado aki nos kier a gradici tur instancia, compania y persona cu a ofrece nan cooperacion y aporta cu donacion, cu producto y transporte pa asina esaki por a resulta un exito. Un danki special ta bay na Nagico Aruba, Ecotech, My Computer, Rennaisance Hotel, Gianni’s Group, Utilities NV, De Palm Corporation, Riu Hotel y tur otro cu a brinda nan ayudo y cooperacion y ta desea di keda anonimo.
Proximamente nos lo sigui organisa Tayo Riba Mesa, e siguiente lo tuma luga dia 25 di mei pa asina sigui yuda esunnan den necesidad. Un biaha mas masha danki na un y tur!
