Recientemente parlamentario Setty Yarzagaray (MEP) a expresa cu a adapta e ley contra abuso di mucha y a aumenta e castigo. Pero na Aruba no ta conoce ley minimo y Fundacion Mi Voz Ta Bo Voz a boga p’esaki. Tin hopi cos cu mester cambia.
Lisette Gomes, presidente di Fundacion Mi Voz Ta Bo Voz, a expresa cu aki na Aruba no ta existi ley minimo, pero desde 2010 nan ta boga p’esaki. Sinembargo, ley minimo a haya un conseho negativo di tanto Directie Wetgeving en Juridische Zaken (DWJZ) como corte. E huesnan no ta kere den esey mirando cu hopi caso na Aruba no ta acute (severo), cu ta caso denuncia dentro di 72 ora unda ta haya e pruebanan. Caso unda cu eynan tin tur prueba y tin un caso hopi cera, eigenlijk cu e pruebanan di cual ta condena e persona.
El a sigui splica cu hopi di e casonan a pasa un tempo largo caba, esta aña, despues e mucha ta bin dilanti y papia. Esey ta haci cu e pruebanan ta menos fuerte y e ora ta papia di persona cu en realidad no por duna nan e minimo. No por compara un verkrachting, un mishimento y e ora e balansa no t’ey. E ora ta bay tin hopi caso cu e persona lo sali liber pa falta di prueba. P’esey a haya un mal conseho of e huesnan no ta di acuerdo cu esey, pasobra esey lo ta e resultado di e caso.
Si esey ta e punto final of ta bin cu algo otro, el a indica cu hopi tempo ta papia di ley. Sinembargo, e problema ta sinta na ki momento e mucha ta bay conta kico a pasa cu ne, ki momento ta bay entrega keho. P’esey aworaki ta papiando di prevencion. Cu e mucha ta consciente cu na momento un hende mishi cu ne, e ta bay papia.
Pa mas lesa TREMPAN.COM.
