E aña aki e Federacion di Deportenan di Motor di Aruba a cumpli su prome aña. Nan ta encarga cu maneho di e propiedad na Palo Marga, pa loke ta caredanan di dragrace. Richard Every, presidente di e federacion, a splica cu nan ta instala desde fin di aña 2019.
E aña aki tabatin retonan grandi, mirando e situacion di COVID y tambe pa tur hende siña di e situacion. Ta parce cu nos lo tin cu biba cu ne pa resto di nos bida, e normal nobo.
E reto tabata pa logra toch di bay dilanti cu e situacion di e compleho di Palo Marga. E federacion ta responsabel pa e compleho y pa e situacion con por maneh’e cu tur e diferente deportenan di motor, riba e mesun compleho aki.
Perspectiva pa aña 2021
Pa otro aña, e di dos mita di aña a cuminsa pensa riba un kalender. Mirando tur e reglanan stipula y ta cambia pa luna, toch a traha un kalender pa tur e deportenan y mirando kico ta pasa durante aña lo tin cu adapta na cierto regla y protocolnan di COVID.
Tambe a bay mas leu cu a habri porta di Palo Marga pa otro tipo di deporte por tuma luga door di e tamaño grandi di e facilidad. E deporte di coremento di bicicleta, coremento na pia tin problema awor aki cu no por haya permiso pa haci’e riba caya debi na e aglomeracion. E ora ta purba yuda e deportenan ey tambe cu e facilidad y for di eynan pa yega na un kalenderjaar cu por tin actividad tur siman riba e pista di Palo Marga.
Asina tur siman lo tin un evento pa hende cuminsa train nan deportenan. E federacion ta bezig cu un grupo cu ta maneha, hunto cu un arkitecto pa un Masterplan y un Businessplan. Esaki ta den fase basta avansa. Ta algo cu por entrega na e departamentonan concerni di Gobierno, pa asina por bay dilanti cu e desaroyo di e compleho.
Pa tur e deportenan por practica, mester di ampliacion di e tereno y adaptacion di infrastructura di e compleho. Mirando cu ta un federacion, a acerca nan caba y e bon cos ta cu a sinta den e comision di deporte y a invita nan pa bay Parlamento pa presenta e prome parti di e fasenan di cambio na Palo Marga.
