Awe tardi pa mas of menos 5:15pm a manda un patruya di polis pa dam di Rooi Afo pa un caha fuerte. Ey polis a topa cu un cunukero “Franklin”, cu a conta nan cu di algun dia caba e ta fiha un caha fuerte den e dam, pero e tabata leu. Awe e caha fuerte a yega mas cerca y asina a trece canto.
Franklin a conta 24ora.com na e sitio cu e tin 4 pa 5 dia ta biniendo e dam di Rooi Afo y ta mira algo ta drif. Segun Franklin, tur dia e ta na e dam pa coy awa pa e planta. E ultimo dianan aki cada biaha e mira e cos cu ta drif, el a purba yega cerca pero door cu ta hundo, e no a confia. Pero awe a mira cu e locual ta drif a yega mas cerca di canto, pa cual Franklin a dicidi di sac’e.
Ta te ora cu el a saca e artefacto el a ripara cu ta un caha fuerte e ta, pa cual el a dicidi di yama polis mesora. Di e forma ey polisnan por haya un pista, si acaso ta horta e caha fuerte ta. Franklin a conta cu el a haya e caha fuerte habri y cu un baranca den dje. E mes ta kere cu nan a uza e baranca pa purba sink e caha fuerte. Separa di e baranca no tabatin nada mas, pues ningun documento, pio placa of prenda. Di cuando dia e tin tira eyden, no ta conoci pe.
