Diasabra 20 di april, un grupo di ciudadano tabatin e privilegio di presencia e esfuerso colectivo pa un mision: sirbi e comunidad. Centro di Bario Lago Heights tawata e punto di enfoke di e empeño aki. Edmentum, un compania Mericano di software educativo a lidera e iniciativa aki.
Riba e dia aki, 85 boluntario di Edmentum cu ta yama nan mes Edmenturs, a uni forsa cu boluntarionan local y trahadonan di construccion pa completa e construccion di un cancha di basketball, un pista di bicicleta, un ‘speeltuin’, murals y traha bakinan di mata dilanti e edificio. E proyecto aki tin como meta pa no solamente eleva e Centro di Bario, pero tambe pa brinda oportunidadnan y facilidadnan recreativo y deportivo pa muchanan y hobennan di e bario.
E inicio di e proyecto a cuminsa pa Linda Nessim, un organisado di evento talentoso, kende a acerca CEDE buscando pa facilita un conexion cu un organisacion local cu lo por of ta desea un espacio educativo y recreativo pa brinda pa muchanan y hobennan den comunidad. CEDE a suministra Linda cu e informacion di diferente organisacion local, cual finalmente Edmentum a scoge Centro di Bario Lago Heights como e beneficiario di e esfuerso aki.
Cu un vision, Linda conhuntament cu e Programmaleider di Centro di Bario Lago Heights Shalinie Flores-Rodjan, a traha cu atencion na detaye pa un strategia y un plan detaya pa implementa e proyecto aki, identificando e componentenan esencial pa por a realisa esaki den un tempo cortico.
Pa por a realisa e vision aki, tabatin mester di un esfuerso colectivo y nan ta extende nan gratitud na e contribucion generoso di Edmentum, Super Food Plaza Cares Program, De Palm Tours, Aruba Convention Bureau y Cmart Aruba. Ta door di nan sosten valioso e proyecto aki por a bira un realidad.
“Bario Unico”, un proyecto di CEDE lansa na 2023, ta diseña pa forma conexion y empodera e Centronan di Bario. E obhetivo ta pa ekipa e Centronan aki cu diferente recurso y hermentnan pa revitalisa nan funcionamento den e comunidad. Si ta desea pa participa como boluntario of contribui den otro forma na e Centro di Barionan, por contact nos na: 5827666 of via email na [email protected]. E organisacion ta cla pa brinda guia con personanan of instancianan por haci un contribucion na tanto e Centro di Barionan y e comunidad en general.
