Pa operacion di tur negoshi, mester di un cuenta di banco. Mas awendia cu mayoria di transaccionnan ta tuma luga di forma electronico. Mirando cu nan no ta logra yega na un acuerdo cu Aruba Bank, Bochincha Container Yard (BCY) y su director Otmar Oduber a dicidi di bay Corte.
Abogado mr. Kuster kende a representa BCY a bisa “nos a entrega tur documento cu nan a pidi y tabata semper transparente cu tur informacion. A duna relato di loke ta e entradanan, con esakinan a drenta y fechanan. Pero te ainda no por habri un cuenta. Un cuenta ta necesario pasobra loke tin na placa cash aworaki ta enorme. Den e temponan aki, cu atraconan tumando luga, mi cliente no por keda cu placa cash,” e abogado a bisa pa mustra e necesidad urgente cu su cliente tin pa haya un cuenta di banco. “Traha tur dia cu placa cash ta trece peligro cu ne.”
Ademas pa e operacion diario, e abogado a mustra cu mester di un cuenta di banco pa cumpli cu nan otro debernan. Departamento di Impuesto desde e luna aki ta practicamente online so, cu excepcion di clientenan 60+. Pues pa Bochincha por cumpli cu su pagonan di belasting, nan mester di un cuenta. Den e caso aki Otmar Oduber ta e unico director di e compania.
E splicacion cu banco a duna na e director di BCY ta cu e escandalo cu e ta den dje, sospechoso di actonan ilicito, por trece mal publicidad pa e institucion bancario. Esaki ta loke Oduber y su Abogado no ta compronde. Otmar Oduber ta cliente di e banco pa casi 30 aña, su yiunan, su casa y demas famia tur tin cuenta cu Aruba Bank.
No ta mira motibo pakico ta nenga di habri e cuenta, pasobra BCY no tin nada di haber cu e investigacionnan cu Ministerio Publico tin contra Otmar Oduber. Di con no ta actua di mesun manera di clientenan di nan cu a yega cu a cera of tira inval den nan negoshi, e Abogado a puntra. BCY ta cumpli cu tur rekisito di ley.
Abogado di e banco Mr. Theresa Fernandes Pedra a cuestiona e rol di Otmar Oduber den e caso aki. No sa kico ta e interes di Oduber den e caso, pasobra ta papia aki di Bochincha Container Yard cu no por habri e cuenta.
Tampoco ta compronde di e caso sumario, cu parce no ta asina urgente si mira e cantidad di tempo transcurso. A warda 4 luna prome cu a dicidi di entrega peticion, y un siman despues di nan apertura oficial, pa un caso sumario. Dia 31 di juli caba, segun e abogado aki, a bisa cu no ta habri cuenta. YUn ponencia cu Otmar Oduber, como director di BCY, a rechasa. El a bisa cu e banco a want’e na liña y nunca a dun’e un NO rotundo. Pero tampoco ta compronde a demanda Aruba Bank y no otro banconan. Pero asina mes nan ta kere cu prome cu e negoshi a habri, e mester a regla un cuenta di banco pa e sigura su operacion.
Mr. Fernandes Pedra a recorda cu Banco Central di Aruba ta obliga tur banco na Aruba haci un investigacion riba clientenan, of persona of negoshinan cu haci peticion pa un cuenta di banco. Si tin tiesgo cu por uza e institucion pa comete fraude of labamento di placa, nan no ta acepta e cliente nobo aki. Otmar Oduber, su famia y cuentanan cu el a habri ultimo, tur a sosode prome cu maart di aña pasa.
Hues dado momento a puntra e representantenan di banco si no por habri un cuenta y dado caso e haya un condena, ta cera e cuenta. E contesta tabata un NO rotundo. Tin hopi mas cos ta hunga un rol cu solamente e entrega di placa cash. Ademas, si e ta bay pa esey so, e ta exigi un monitoreo intensivo di cada transaccion, debi na e sospecho cu tin riba Otmar Oduber. Ta pa e motibonan aki cu banco no ta habri cuenta ni pa casinonan ni pa e negoshinan di benta di number, demasiado placa cash.
Ya caba den pasado Aruba Bank mester a lucha contra un boet di mey miyon florin ora cu a descubri cu un doño di trabou tabata uza su trahadonan pa deposita y transferi placa p’e.
Oduber mes a hiba palabra bisando cu e mester a cuminsa e caso aki pasobra e no tin otro caminda mas. Semper e y su famia tabata cu e banco. Hasta ora cu Aruba Bank a tarda, el a dicidi di informa na otro banco y nan a bis’e di biaha no. P’esey e ta insisti cu nan. E no a papia solamente cu su account manager pero cu ehecutivonan halto di e banco, y hasta dado momento nan a pidi disculpa pasobra e asunto ta tardando. E no ta compronde pakico a tene na liña, si e tabata tur transparente posibel. Como consultant el a yega di haci trabou pa BCY y nan mester a page cash. E placa aki el a deposite riba su cuenta y el a splica nan di unda esaki a bini.
Na final Hues a puntr’e si e lo acepta pa habri un cuenta bou condicion. Su contesta di biaha tabata un SI.
Dia 3 di februari lo dicta fayo den e caso aki.
