Despues di casi 30 aña dedica na bida publico, nuebe di nan como parlamentario y dies como minister, mi compromiso cu Aruba ta keda intacto. Politica nunca tabata simplemente un profesion pa mi. E tabata un vocacion, un responsabilidad y riba tur cos, un pasion pa traha pa nos hendenan.
Awendia mi persona ta pasando door di un proceso huridico complica y cu hopi prerogativo. Tin un veredicto cu mi no ta di acuerdo cu ne y mi ta sigui defende mi posicion pa medio di e camindanan legal cu ta disponibel dentro di nos sistema hudicial. Mi ta kere den e derecho pa defende mi mes, den mi derecho pa sigui busca husticia y den e posibilidad pa sigui uza e recursonan cu nos sistema huridico ta ofrece.
Pero mi ta kere tambe cu un situacion huridico, pa mas dificil cu e por ta, no mester bira un motibo pa bandona e conviccionnan cu mi persona a defende durante henter mi bida.
Dicon mi ta sigui papia, cuestiona, traha y expresa mi opinion y vision tocante futuro di Aruba? Pasobra mi compromiso cu e pais aki no a cuminsa cu un puesto politico y tampoco ta caba cu un sentencia.
Un trayecto marca pa decisionnan
Durante mi mandato como Minister di Turismo, Transporte y Asunto Laboral, mi a defende un vision di desaroyo cu tabata bay mas leu cu solamente cifranan economico. Mi meta tabata crea oportunidad, fortifica nos institucionnan y a logra construi un pais cu mas posibilidad pa e generacionnan di awe y di mañan.
Den turismo, mi a crea un instituto fuerte, competitvo, profesional y sostenibel, ATA SG, y a traha pa fortifica promocion internacional di Aruba creando un balansa cu e desaroyo local y di nos hendenan. A amplia nos oportunidad den mercadonan nobo y mehora nos oferta como destino. Entre e iniciativanan impulsa durante mi mandato tabatin e desaroyo di entre otro e Linear Park, un proyecto cu tabata busca combina naturalesa, bienestar, salubridad, espacio publico y desaroyo turistico. Awe, ora mi mira e importancia cu e espacio aki tin pa nos comunidad, esaki ta reforza mi conviccion cu decisionnan di gobierno mester mira mas leu cu solamente e presente.
Den asunto laboral, mi a impulsa cambio cu e conviccion cu desaroyo economico mester bai hunto cu condicionnan miho pa trahadornan. E reduccion di e siman laboral di 48 pa 45 ora tabata parti di e vision ey. Mi aspiracion tabata pa avanza gradualmente pa un siman laboral di 40 ora, como un paso pa mehora condicionnan laboral, aunque e meta aki no a logra materialisa completamente durante mi mandato. Varios leynan akeda adapta na defensa y beneficio di nos clase trahado
Un otro parti importante di mi vision tabata fortifica capacidad di nos institucionnan door di duna nan mas autonomia organizativo. E transformacion di departamento y servicio publico, incluyendo e area di control di trafico aereo, tabata responde na e idea di tin estructura mas especializa y prepara pa cumpli cu nan responsabilidadnan. ANSA awe ta un ehempel den nos region.
Den area di vivienda, un di e metanan cu a motiva mi mas tabata yuda famianan di Aruba haya e oportunidad pa tin nan mes cas. Durante mi mandato nos solamente a percura pa reglanan y maneho transparente pero mas ainda husto pa tur nos hendenan cu a conduci na mas di 2000 tereno pa viviendanan cu a keda otorga despues cu nos hendenan tawata tin entre 10 y 25 anja ta warda entre e relacion y desaroyo di vivienda na DIP. E meta tawata pa traha cu e meta di ofrece solucion pa miles di familia, cu procedimiento transparente y oportunidad pa esnan cu tabata realmente tin necesidad di un cas. Pa mi, vivienda nunca tabata solamente un asunto di infraestructura: e tabata nifica seguridad, stabilidad y dignidad pa e famia.
San Nicolas: kere den e potencial di nos hende
San Nicolas tin un lugar special den mi vision pa Aruba.
Mi a kere semper cu desaroyo di Aruba no por concentra solamente den un parti di e isla. San Nicolas tabatin y ainda tin un potencial cultural, historico, turistico y economico enorme cu tabata merese un oportunidad real.
Mi vision tabata contribui pa San Nicolas recupera su importancia como ciudad di cultura y Patrimonio di herencia, creando condicionnan pa atrae inversion, bishitante y oportunidad nobo pa su habitantenan.
E desaroyo turistico cu nos ta observa awe den e zona, incluyendo e vision y esfuerzonan pa un hotel Secrets Baby Beach Aruba, ta forma parti di un transformacion mas amplio cu impacto mester wordo evalua mirando e historia completo. Proyecto di e tipo aki ta requeri inversion, continuidad y e trabou di hopi actor. Pero pa mi, loke semper tabata importante ta mantene bibo e vision cu San Nicolas por bira un motor di oportunidad pa su mes comunidad. Mester inverti pa crea e ripple effect awo riba e desaroyo cu e hotel a trece y por impulse.
Esakinan ta algun ehempel di e areanan den cua mi a traha y di e conviccionnan cu a guia mi decisionnan. Mi no ta pretende atribui tur resultado cu Aruba a logra na mi so, pasobra ningun proyecto di e magnitud aki ta obra di un solo persona. Sin embargo, mi ta considera cu ta completamente legitimo recorda e iniciativanan cu mi a promove, e decisionnan cu mi a tuma y e vision cu mi a defende durante mi mandato.
Mi situacion huridico no ta elimina mi responsabilidad publico
Precisamente pasobra mi a dedica tanto aña na servicio publico, mi ta considera cu mi mester sigui participa den e debate tocante futuro di nos pais.
Mi posicion tocante e caso huridico cu mi ta enfrenta ta conoci. Mi no ta di acuerdo cu e interpretacion cu a duna na mi actuacionnan den cuadro di mi tarea como mandatario y mi ta sigui defendiendo mi derecho pa presenta mi posicion den e marco legal. Un sirbidor di pueblo mester por duna contenido na e tarrea aki, semper y cuando no ta kibra niun ley of regla fiha. E hecho cu penalmente kier drenta den e resposabilidadnan di maneho ta un asunto cu tin cu worde difini y separa for di otro, dunando e espacio necesario pa “bestuurrecht” por worde control y vigila via nos Parlamento como e otro pia di nos trias politca,
Segun mi perspectiva, e hechonan mester wordo examina tumando na cuenta e contexto di e maneho gubernamental, e actuacionnan cu a tuma lugar y e limitennan di loke mi ta considera tabata politicamente permisibel. Esaki ta mi posicion tocante e caso, y ta pa medio di e camindanan huridico apropia mi lo mester sigui defende e posicion aki.
Mi no ta pretende sustituí un decision huridico cu mi opinion personal ni pidi cu e proceso wordo ignora. Loke mi ta sostene ta cu mi tin tambe derecho pa defende mi mes y pa sigui ehecuta mi derechonan conforme e mesun ley aki.
Y mientras mi ta defende mi caso, mi ta sigui un ciudadano comprometí cu Aruba y e lider di un organisacion politico cu tin responsabilidad cu e comunidad.
Ora mi observa un situacion cu, segun mi opinion, ta perjudica comunidad, mi ta sinti e responsabilidad pa pronuncia mi mes. Ora mi ta considera cu un decision mester wordo cuestiona, mi ta kere cu mi mester haci esaki cu argumento. Y ora mi mira oportunidad pa mehora bida di nos hende, mi ta considera cu nos mester papia di nan y traha pa haci nan realidad.
No lo tabata consistente cu mi trayecto pa keda keto solamente pasobra awe mi por ta pasando den un situacion complica.
Durante mi carrera, mi semper tawata un politico cu a tuma decision, defende posicion y acepta e consecuencia di su actuacionnan. Mi sa cu por cuestiona mi decisionnan y cu no tur hende mester comparti mi opinion. Esaki ta parti di democracia.
Pero mi ta kere tambe cu democracia tin mester di politico cu ta dispuesto pa papia, asumi responsabilidad y defende comunidad, hasta ora haci esaki ta dificil.
Mi pasion pa Aruba ta sigui biba
Mi historia politico no ta resumi den un solo caso huridico, mescos cu historia di un persona no por compronde sin examina su trayecto completo.
Mi a dedica un parti importante di mi bida pa traha pa turismo, empleo, vivienda, desaroyo institucional y oportunidad pa nos hende. Esakinan ta e areanan den cua mi a intenta laga un contribucion y den cua mi ta kere cu mester evalua mi trayecto.
Awe, como lider di PPA, mi ta sigui sinti e mesun responsabilidad pa scucha pueblo, señala problema y defende loke mi ta considera ta mihor pa Aruba.
Mi lo sigui defende mi posicion dilanti di husticia. Y mi lo sigui expresa mi opinion politico dentro di e marco di ley, cu argumento y cu e conviccion cu nos pais tin necesidad di hende cu ta dispuesto pa compromete nan mes cu su futuro.
Mi no ta pidi niun hende bandona su propio criterio ni acepta automaticamente mi version di e hechonan. Mi ta pidi pa reconoce mi derecho pa defende mi mes y pa sigui participa den bida publico conforme ley.
Pasobra mi compromiso cu Aruba ta existi desde prome cu e situacion aki, y ta bai mas leu cu ne.
Kisas mi ta enfrenta un di e capitulonan mas dificil di mi bida, pero mi pasion pa sirbi Aruba ta sigui biba. Mi derecho pa defende mi mes ta keda, y mi responsabilidad cu e pueblo no a desaparece.
Pa mi, politica nunca a trata solamente di ocupa un posicion. E tabata trata di traha, tuma decision, defende conviccion y busca oportunidad pa nos hendenan.
Y mientras mi tin e posibilidad legal y e conviccion personal pa contribui na futuro di Aruba, mi lo sigui hacie. Keda keto no ta un opcion!
