Falta solamente 65 dia pa 1 di januari 2027, e fecha riba cual Minister-President Mike Eman a anuncia cu e lo laga su funcion. Sinembargo, te na e momento aki, no tin claridad publico tocante ken lo tuma e responsabilidad di Minister-President over.
E situacion aki ta lanta preguntanan serio cu no por keda sin contesta. Con ta posibel cu, cu solamente 65 dia pa e cambio anuncia, Parlamento y pueblo di Aruba ainda no tin claridad tocante ken lo asumi e liderazgo di gobierno y con e transicion lo wordo organisa? Mi ta expresa mi preocupacion profundo pa e falta di claridad rond di un cambio asina importante pa gobernacion di nos pais. Nos no ta papia aki di un cambio di gobierno despues di eleccion, sino di un cambio di Minister-President dentro di e mesun gobierno cu actualmente ta na poder.
E cambio aki no ta solamente un asunto interno di un partido politico. E funcion di Minister-President ta un responsabilidad publico, cu tin implicacion pa e direccion politico di pais, e continuidad di maneho gubernamental y e responsabilisacion dilanti di Parlamento y pueblo.
A solicita reunion publico… te awe sin contesta!
Fraccion di MEP a solicita un reunion publico cu Minister-President Mike Eman pa trata su anuncio di retiro, e proceso di sucesion y e garantia pa un transicion ordena dia 16 di juni 2026. Sinembargo, te cu dia di awe, e reunion solicita no a keda yama.
Como parlamentario mi ta considera preocupante cu un peticion pa discuti un asunto asina importante ainda no a resulta den un reunion publico, mientras cu e fecha anuncia pa e salida di Minister-President ta acerca rapidamente.
Pakico tin tanto falta di transparencia y seriedad den un asunto asina importante pa Aruba? Pakico ta evita e responsabilisacion den Parlamento ora ta trata di un decision cu por afecta e direccion di nos pais? Parlamento no ta existi solamente pa aproba ley y trata presupuesto; Parlamento tin un responsabilidad fundamental pa controla gobierno, haci pregunta y exigi splicacion den interes di pueblo di Aruba. Lastimamente, Presidente di Parlamento no ta cumpli cu e Reglement van Orde y no ta tene su mes na e principionan di bon gobernacion. Algo cu a cuminsa bira un custumber den Parlamento di Aruba y cu sigur ta un situacion hopi peligroso.
Mi ta subraya cu ora un Minister-President anuncia su salida, y e fecha ta acerca, ta mas cu normal pa Parlamento pidi claridad tocante e proceso y e garantia pa continuidad di gobierno. E pregunta no ta solamente ken lo bira e proximo Minister-President. E pregunta ta tambe pakico, faltando solamente 65 dia, ainda no tin claridad publico suficiente y pakico e peticion pa un reunion publico no a resulta den un reunion.
Brinda transparencia y duna responsabilisacion ta un deber
Mi ta considera cu e situacion aki mester wordo trata cu e seriedad cu e merece. Falta di claridad por alimenta incertidumbre y genera preguntanan legitimo den sociedad. No ta suficiente pa anuncia un fecha di salida. Ta necesario pa duna claridad tocante e proceso cu lo conduci na e cambio, y pa informa Parlamento y pueblo na tempo.
Falta solamente 65 dia pa 1 di januari 2027 y Aruba merece claridad tocante ken lo dirigi e mesun gobierno di AVP-Futuro entrante e fecha ey. Parlamento y Pueblo kier claridad, pasobra ora ta trata di e direccion di nos pais, transparencia no ta un fabor, e ta un responsabilidad.
