E futuro di Aruba ta wordo forma no solamente door di e talentonan cu nos tin localmente, sino tambe door di e conocemento, experencia y habilidadnan cu nos hobennan y profesionalnan arubano ta desaroya rond mundo. Pa Ministerio di Educacion, fortalece e conexion entre educacion, mercado laboral y talento Arubano den exterior ta un prioridad importante pa contribui na desaroyo sostenibel di nos pais.
Den e contexto aki, Minister di Educacion, mr. Gerlien Croes, ta destaca e importancia di cooperacion cu institucionnan educativo, sector priva y partners strategico, tanto local como internacional, pa crea mas oportunidad pa intercambio di conocemento y desaroyo profesional.
Un ehempel concreto di e cooperacion aki ta Inspiring the Future – Healthcare Edition, un iniciativa organisa door di Plataforma Educacion y Labor (PEL), cu a reuni studiante y hobennan profesional arubano den exterior pa comparti experencia, intercambia conocemento y dialoga tocante e futuro di sector di cuido di salud na Aruba.
“Nos hobennan cu ta studia y traha den exterior ta acumula un rikesa di conocemento y experencia cu tin un balor grandi pa Aruba. Como Ministerio di Educacion, nos ta considera importante pa mantene e conexion cu nan, scucha nan perspectiva y explora con nos por conecta nan talento cu e oportunidadnan y necesidadnan di nos pais. Nos talento Arubano, unda cu nan ta den mundo, ta sigui forma parti di futuro di Aruba,” Minister Gerlien Croes a expresa.
Educacion y mercado laboral: un conexion esencial pa futuro
Un di e puntonan central den vision di Ministerio di Educacion ta e necesidad pa acerca educacion na realidad y desaroyo di mercado laboral. Esaki ta encera no solamente preparacion academico di nos studiantenan, sino tambe e oportunidad pa nan desaroya competencianan relevante, conoce e posibilidadnan profesional y mantene un conexion cu Aruba durante y despues di nan trayectoria educativo.
E iniciativa Inspiring the Future – Healthcare Edition a crea un espacio pa dialoga tocante e oportunidadnan y desafionan den sector di cuido di salud, incluyendo e posibilidadnan pa sigui un carera profesional den exterior, bolbe Aruba of contribui na desaroyo di nos pais mediante intercambio di conocemento y experencia.
Minister Gerlien Croes ta enfatisa cu e meta no ta solamente pa stimula nos hobennan pa regresa Aruba, sino pa crea un relacion duradero cu nan, independientemente di unda nan ta desaroya nan carera profesional.
“Nos mester mira nos studiantenan y profesionalnan den exterior como un extension di e potencial cu Aruba tin. Nan experencia internacional por brinda perspectiva nobo, innovacion y solucionnan pa desafionan cu nos pais ta enfrenta. E reto ta pa nos crea e conexionnan necesario pa transforma e potencial aki den oportunidadnan concreto,” Minister Gerlien Croes a indica.
Partnernan strategico como brug entre Aruba y talento den exterior
Pa logra un conexion duradero entre Aruba y su talento internacional, cooperacion cu partners strategico ta esencial. Den e contexto aki, organisacionnan manera MLTP Choice y AMA na Hulanda ta hunga un rol importante den e acercamento cu studiante y hoben profesional Arubano cu ta desaroya nan trayectoria educativo y profesional den exterior.
E tipo di cooperacion aki ta contribui na crea brugnan entre institucionnan, profesionalnan y e necesidadnan di mercado laboral Arubano. Door di mantene un dialogo activo cu partners den exterior, por identifica oportunidadnan pa intercambio di conocemento, capacitacion, colaboracion profesional y posibel conexionnan cu sector laboral local.
Pa Ministerio di Educacion, e relacionnan aki ta importante pasobra nan ta complementa e esfuersonan local pa fortalece e aliniacion entre educacion y mercado laboral.
“Educacion no ta termina ora un studiante ricibi su diploma. E ta un proceso continuo di siñamento, crecemento y desaroyo. P’esey nos ta balora partnernan cu ta yuda mantene e conexion entre Aruba y nos talento den exterior. Hunto nos por crea mas oportunidad pa nos hobennan y, na mes momento, contribui na e desaroyo di nos pais,” Minister Gerlien Croes a destaca.
PEL ta fortalece e dialogo entre educacion y sector laboral
Como plataforma cu ta promove cooperacion entre educacion y mercado laboral, Plataforma Educacion & Labor (PEL) ta hunga un rol importante den acerca diferente sector y stakeholdernan pa identifica oportunidadnan y necesidadnan di desaroyo profesional na Aruba.
Cu Inspiring the Future – Healthcare Edition, PEL a inicia un serie di encuentronan enfoca riba diferente sector economico y profesional, cu e intencion pa crea un espacio continuo pa dialogo, intercambio di experencia y conexion entre talento Arubano y mercado laboral.
Despues di e prome edicion dedica na cuido di salud, PEL tin como meta pa sigui cu edicionnan enfoca riba Ciencia & Tecnologia, Turismo, y Business Administration y Comercio.
E acercamento sectorial aki ta brinda oportunidad pa profundisa e dialogo riba e competencianan cu cada sector ta rekeri, e preparacion di futuro profesionalnan y e manera cu educacion por sigui conecta cu e cambionan y exigencianan di mercado laboral.
Minister Gerlien Croes ta considera e iniciativa un ehempel positivo di con cooperacion entre Gobierno, institucionnan educativo y sector priva por contribui na un miho entendimento di e necesidadnan di nos pais.
Inverti den conexion, conocemento y oportunidad
Ministerio di Educacion ta reafirma su compromiso pa sigui sostene iniciativanan cu ta fortalece e relacion entre educacion, desaroyo profesional y mercado laboral. Den un mundo cu ta cambia rapidamente, e capacidad pa conecta talento, comparti conocemento y adapta na necesidadnan nobo ta esencial pa prepara Aruba pa futuro.
Minister Gerlien Croes a expresa su aprecio na Plataforma Educacion & Labor (PEL) pa e organisacion di e iniciativa, y na Islescale, MLTP Choice, Delta Blue Innovative Solutions, SETAR y Aruba Tourism Authority (ATA) pa nan colaboracion y contribucion.
“E desaroyo di Aruba ta un responsabilidad comparti. Gobierno so no por logra tur cos, pero door di uni forsa cu nos institucionnan educativo, sector priva y partnernan internacional, nos por construi e puentenan cu nos hobennan y nos pais tin mester.
Nos kier un Aruba caminda talento ta haya oportunidad pa crece, caminda conocemento ta wordo comparti y caminda educacion ta contribui directamente na e futuro economico y social di nos comunidad. Pasobra ora nos inverti den conexion cu nos talento, nos ta inverti den futuro di Aruba,” Minister Gerlien Croes a conclui.
