Prome Minister mr. Mike Eman ta sigura cu Aruba no por sigui tarda den tuma decisionnan pa mehora entrada di trahadonan, mientras industria turistico ta presenta cifranan di exito. Den un entrevista cu 24ora.com, el a reacciona riba preocupacion di Camara di Comercio tocante e forma y rapides cu gobierno kier avansa cu e aumento di salario minimo. Segun Eman, e necesidad social ta evidente y gobierno tin e responsabilidad pa actua.
Prome Minister Mike Eman ta bisa cu durante su reunionnan na Hulanda el a ricibi reaccion positivo riba e intencion di Gobierno di Aruba pa aumenta salario minimo. Segun Eman, tanto den Eerste Kamer como cerca Sociaal-Economische Raad (SER) na Hulanda, el a encontra preocupacion pa e manera cu e crecemento di turismo no ta traduciendo den mas bienestar pa e comunidad.
El a menciona tambe e lider di Partido CDA, Henri Bontenbal. E pregunta central den e combersacionnan aki, segun Eman, ta con un isla cu hotelnan di cinco strea y cifranan turistico impresionante no por percura cu e bienestar ey ta yega tambe den cas di e trahadonan.
Aumento gradual
Eman a splica cu den e reunionnan el a presenta e discusion cu ta andando na Aruba pa subi salario minimo. Segun e cifranan cu el a menciona den su declaracion, e intencion ta pa salario minimo pasa di aproximadamente 2.100 florin pa 2.600 florin den un periodo di tres aña.
Hotelnan ta paga salario minimo
E mandatario a indica cu un gran parti di e personanan cu ta gana salario minimo ta traha den sector hotelero. Pa e motibo aki, el ta considera importante pa e crecemento di turismo tambe refleha den e entradanan di esnan cu ta contribui diariamente na e operacion di e industria.
“Nos tin un industria turistico creciente, pero hopi biaha e beneficionan no ta yega suficientemente pa e pais”, Eman a declara, señalando cu e pregunta central ta con pa comparti e prosperidad cu comunidad.
Segun Eman, e cifranan impresionante cu turismo ta presenta no ta suficiente riba nan mes. E reto ta pa percura cu Aruba y su habitantenan ta beneficia mas di e actividad economico cu e sector ta genera.
Hisa tarifa di camber numa
Den su declaracion, Eman a reconoce tambe e preocupacion cu un aumento di salario minimo por trece cu ne un aumento di prijs. Relaciona cu sector hotelero, el a argumenta cu si prijs di un camber di hotel mester subi un poco pa cubri e gastonan, esaki no ta afecta directamente e pueblo di Aruba.
El a subraya cu trahadonan den e sector ta haci sacrificionan grandi pa hotelnan por sigui opera y cu nan aporte mester wordo considera den e discusion tocante reparticion di e prosperidad.
Prosperidad comparti
Eman a presenta e reaccionnan na Hulanda como un señal positivo pa e direccion cu gobierno kier sigui. Segun su declaracion, den ambos reunion tabatin atencion pa e mesun pregunta cu ta central den e debate na Aruba: con pa transforma e exito di turismo den un beneficio mas amplio pa comunidad.
E aumento cu Eman a describi ta forma parti di e proposicion y e dialogo cu ta andando na Aruba. E discusion ta riba un aumento gradual di salario minimo durante un periodo di tres aña, cu e meta pa mar’e na e bestaansminimum, esta e suma cu un persona tin mester pa cubri su necesidadnan basico. E idea ta pa acerca salario minimo paso pa paso na e nivel aki, pa trahadonan cu e entradanan mas abou por sostene nan gastonan esencial y beneficia mas di e prosperidad economico di Aruba.
Reaccion riba critica di Camara di Comercio
Confronta cu e preocupacion di director di Camara di Comercio cu gobierno kier “bulldoze” e ley sin haci un estudio debido, Eman a pone enfasis riba e datonan ta disponibel caba. El a señala cu Camara di Comercio mes a contribui cu cifranan importante den e discusion y cu informacion di CBS tambe ta mustra e diferencia entre salario minimo y loke un hende tin mester pa cubri su necesidadnan basico.
Pa Eman, e datonan aki ta confirma cu tin miles di ciudadano cu ta traha, pero cu no por cubri nan gastonan cu e salario cu nan ta cobra. El a agrega cu su bishitanan na cas y den barionan ta mustra e realidad tras di e cifranan.
E Prome Minister a reconoce cu comercio tin su propio rol y cu por tin preocupacion tocante e consecuencianan di un aumento. Sinembargo, el a cuestiona e tardamento den e dialogo y a sostene cu gobierno no por keda pospone su responsabilidad dilanti un situacion di pobresa.
“Nos no tey pa haci locual ta facil so”, Eman a expresa.
Prosperedad turistico mester yega na mas hende
Eman a describi e proposicion pa acerca salario minimo na e minimo di subsistencia como parti di un decision importante tocante e futuro di Aruba: con reparti e prosperidad di un manera mas husto.
Segun Eman, un parti importante di e trahadonan cu ta gana salario minimo ta activo den sector hotelero. El a enfatisa cu e empleadonan aki ta haci sacrificionan grandi pa e industria por funciona y cu nan tambe mester sinti e beneficio di su crecemento.
Tocante e preocupacion cu aumento di salario por causa prijsnan mas halto, Eman a duna como ehempel cu un eventual aumento den prijs di un camber di hotel no ta afecta directamente e cartera di e habitante di Aruba. Su argumento ta cu e industria mester analisa bon con e por contribui mas na bienestar di esnan cu ta sostene su operacion diariamente.
Pobresa tin consecuencianan social
E Prome Minister a conta cu durante e proceso di formacion di gobierno, el a scucha casi shen organisacion. E preocupacion pa pobresa a surgi repetidamente den e combersacionnan.
El a relaciona e presion financiero den famianan cu problemanan social, incluyendo situacionnan den cual hobennan ta sali di scol pa bay traha. Tambe el a expresa preocupacion pa criminalidad creciente y e consecuencianan cu desigualdad por tin pa comunidad.
Den su analisis, Aruba mester cuida e relacion entre su pueblo y turismo. Eman a adverti cu ora habitantenan ta sinti cu nan ta sacrifica demasiado, mientras e beneficio no ta yega suficientemente cerca nan, esaki por afecta e compromiso di comunidad cu e industria.
Eman ta compara resistencia cu introduccion di AZV
Pa ilustra cu reformanan social no ta bin sin oposicion, Eman a recorda e resistencia cu tabatin durante e introduccion di AZV, bou di liderazgo di Henny Eman. Na e momento ey tambe tabatin obhecion di diferente sector, mientras cu awendia AZV ta considera un logro importante pa Aruba. El a uza e ehempel aki pa sostene cu resistencia no ta necesariamente un motibo pa gobierno para un medida cu e ta considera necesario.
Eman a agrega cu gobierno mester por ricibi y absorba critica, pero tambe mantene su compromiso cu comunidad. Pa e Prome Minister, e meta ta pa e exito economico di Aruba ta refleha mas claramente den bida di su trahadonan y famianan.
