Universidad di Aruba (UA) tabata tin dos dia di estudio y presentacion publico dedica na e tema “Multilingualismo y Hulandes como Lenga Stranhero (NVT) den Enseñansa Primario y Avansa”, cu a tuma luga dia 22 y 23 di october 2026 den un formato hibrido. E encuentro aki a reuni educador, experto, profesional di enseñansa y ketenpartner di e islanan ABC, Surinam y Hulanda pa analisa e retonan linguistico y explora e oportunidadnan pa e futuro educativo den nos region.
E programa a inicia diahuebs 22 di october cu diferente presentacion y un dialogo di panel enfoca riba e temanan linguistico den enseñansa avansa y e preparacion for di e nivel secundario. E presentacionnan aki a keda encarga pa diferente experto, entre otro Vanessa Scholing-Pietersz (Departamento di Enseñansa, Aruba), Nihayra Leona (Dienst Openbare Scholen, Corsou) y Elsmarie Beukenboom (Fundashon Akademia Papiamentu, Boneiro).
Riba diabierna 23 di october, e segundo dia a inicia cu un workshop cera entre e ‘ketenpartnernan’ pa debati e maneho di idioma den enseñansa avansa na e islanan ABC. Consecuentemente, e sesion publico di atardi a continua cu e cuestionnan den practica educativo. Aki a conta cu charla di entre otro Joana Duarte (Rijksuniversiteit Groningen) y Esther Stroucken (Instituto Pedagogico Arubano – IPA), abordando e tema for di e perspectiva di e academianan di formacion di maestro na Hulanda y den region. Como punto di atencion central, Universidad di Aruba (UA), Instituto Pedagogico Arubano (IPA) y Universidad di Curaçao (UoC) a presenta un resumen conhunto di e retonan y e oportunidadnan linguistico pa enseñansa avansa Caribense, complementa pa un retroalimentacion di e sesion di mainta.
E dianan di estudio relevante aki a conta cu e presencia di Minister di Educacion,. mr. Gerlien Croes, kende a presencia e dialogo y oficialmente a clausura e evento. Den su palabranan di clausura, Minister Gerlien Croes a enfatisa e importancia di un vision conhunto y un maneho di idioma solido cu ta responde na e realidad multilingual di e studiantenan den e region Caribense, felicitando e institucionnan pa e paso significante aki.
E evento aki a reafirma e compromiso di e institucionnan educativo di e islanan ABC pa sigui fortalece e calidad di enseñansa a traves di innovacion, investigacion y colaboracion interinsular.
