Riba e celebracion di Dia di Alimentacion hunto cu Mercado Santa Rosa y 50 Aniversario no por a continua sin duna reconocimento na esnan cu semper a contribui y aporta inmensamente cu Aruba su Sector Primario. Na e ocasion aki tabata presente minister encarga cu Sector Primario di Aruba mr. Geoffrey Wever y tambe Nathalie Maduro, Director di Departamento di Agricultura, Cria y Pesca Santa Rosa. Ta un tradicion di Santa Rosa semper na e cocacion aki ta concidera e personanan aki como “Amigo di Santa Rosa pa nan esfuerso, balentia y aporta.
Como reconocimento na e ocasion aki tabata nuebe persona cu ricibi nan reconocimento. Mayoria di nan tambe ta productornan local cu ta coopera cu Santa Rosa na cualkier momento cu nan wordo acerca y tambe ta aporta na Sector Primario.
Como “Amigo di Santa Rosa” a honra Fransico Franken: Un persona cu semper a aporta boluntariamente na ocasionnan di Torneonan di Pesca Organisa pa Fundacion Centro di Pesca Hadicurari y Santa Rosa cu semper ta tuma luga riba Dia di Piscado pa varios aña caba. Franken tabata colega di Santa Rosa laborando den Seccion di Pesca y cu awor ta disfrutando merecidamente di su pensioen.
Otro “Amiga di Santa Rosa” cu a reconoce ta Rachell Peterson kende ta un productor local di diferente tipo di Mushroom. Rachell semper a coopera inmensamente cu Santa Rosa y aporta semper na Sector Primario di Aruba.
“Amigo di Santa Rosa” reconoci ta Anthony Bello cu semper t’ey den tur Mercado Santa Rosa cu cosnan dushi manera Bolo, Kuki y Tert. Un persona balente y cu semper cla pa yuda.
Tambe a reconoce Benjamin Romero como otro “Amigo di Santa Rosa”. Un persona semper alegre hunto cu su señora semper den nos mercadonan ofreciendo “Kombucha” cual ta un bebida natural saludabel combina cu ginger. Ta di admira nan forma di duna informacion di nan producto na clientela.
Otro persona honra como “Amigo di Santa Rosa” ta Franklin v/d Linde. E ta un Criado di bestia cu ta dispone di cabrito, carne, baca y awor tambe tin un “Chicken Farm” cu produccion di Webo fresco local y semper aportando na Sector Primario di Aruba.
No por laga otro “Amigo di Santa Rosa” afo, reconoci pa su gran aporte na Pesca en general di Aruba, cual ta Arthur Giel. Semper Giel ta cla pa yuda y semper aportando na Torneo di Pesca riba Dia di Piscado pa varios aña boluntariamente.
A reconoce WEB Aruba NV tambe como “Amigo di Santa Rosa” pa medio di Alfredo Ruiz, Robert Croes y su director Alfredo Koolman pa nan aporte den diferente forma na Sector primario.
Palabra di gratitud y felicitacion na tur “Amigo di Santa Rosa” reconoci pa medio di Minister mr. Geoffrey Wever y tambe director di Departamento di Agricultura, Cria y Pesca Santa Rosa Nathalie Maduro.
Semper agradecido pa boso esfuersonan haci na Sector Primario di Aruba.
