Mientras cu reglanan mas estricto a drenta na vigor pa garantisa transparencia den e financiamento di partidonan politico, e ehempel di e ultimo eleccionnan, ta mustra cu e implementacion practico ainda ta laga hopi di desea. Esaki Raad van Advies ta comenta den un documento entrega recientemente na gobierno. Integridad den politica y e prevencion di conflicto di interes ta rekeri un control estricto riba ken ta financia e campañanan electoral.
Na aña 2018 a presenta un cambio drastico den e Ley di Partidonan Politico, esta “Landsverordening politieke partijen,”cual a drenta na vigor na aña 2021 (AB 2020 no.153) cu e meta pa eleva nivelnan di transparencia na Aruba. Un di e cambionan mas resaltante tabata e creacion di e e asina yama ‘Commissie Financiën Politieke Partijen,’ un organo independiente encarga cu e control di donacionnan y registronan di e partidonan politico na Aruba. E comision aki a wordo activa di manera completo pa e eleccionnan di 6 di december 2024.
Pa prome biaha, e donacionnan tabata supone di wordo controla di manera integral tanto prome como despues di e proceso electoral.
Promesa di transparencia sin resultado publico
Segun e ley, e Comision tin e obligacion di publica un informe y un resumen di e finansas di e partidonan riba e website di ‘Electorale Raad’ despues di eleccion.
Sinembargo, casi dos aña despues di e eleccion di december 2024, no tin ningun bista cla, ni informe di e finansas eynan riba e proceso aki pa haya.
Raad van Advies ta enfatisa cu maske transparencia ta algo fundamental, mester tin un balans semper entre e interes publico y e derecho di privacidad di sponsornan individual. Donacion di personanan priva, comerciantenan of empleadonan publico por trece riesgonan cu ne si nan wordo haci publico sin un debido hustificacion.
Ta haci yamada pa evaluacio y standardnan internacional
Debi na e incertidumbre y e falta di datonan publico, Raad van Advies ta conseha gobierno pa evalua e ley aki a corto plaso.
Ademas, e organo consultativo ta ripiti su recomendacion pa Aruba busca afiliacion na e grupo internacional GRECO, esta ‘Group of States against Corruption’ di Conseho di Europa. Esaki lo permiti un control y supervision periodico y lo yuda halsa e nivel di integridad politico na e mesun standard cu ta wordo exigi riba nivel internacional.
