Durante conferencia di prensa di diaranson ultimo, Minister di Husticia, mr. drs. Arthur Dowers, a anuncia un cambio den e maneho di sancionnan pa empresanan y personanan cu ta emplea trahadonan indocumenta na Aruba.
Durante ultimo aña, Gobierno di Aruba a brinda un grupo di migrante indocumenta e oportunidad pa regularisa nan estadia y situacion laboral mediante e programa Hunto pa Progreso. E iniciativa aki tabatin como obhetivo pa atende e demanda grandi pa trahadonan den diferente sector di nos economia, mientras na mes momento brinda un oportunidad pa regularisacion.
Despues di e oportunidadnan cu a duna pa medio di Hunto pa Progreso, dificilmente por argumenta cu no a haya suficiente oportunidad pa regularisa e situacion di trahadonan stranhero.
Awo cu e programa Hunto pa Progreso ta den su fase final, Minister Dowers a anuncia cu ta bay reforsa e maneho di sancionnan, incluyendo e aplicacion di multanan administrativo.
Segun e maneho anuncia, un persona natural cu emplea un trahado indocumenta por haya un multa di maximo 10.000 florin pa cada trahado. Den caso di un compania, e multa por yega te 25.000 florin pa cada trahado indocumenta.
Cana e caminda corecto pa evita situacionnan cu lo lamenta
Un preocupacion cu ta topa varios biaha ta cu algun empresa ta inicia e proceso di solicitud pa un prome permiso di trabao, mientras e empleado stranhero ta na Aruba caba y den algun caso hasta ta trahando. Esaki mayoria biaha ta resulta den un negacion.
E maneho ta cla, personanan cu ta aplica pa nan prome permiso regular, mester haci esaki den exterior te ora ricibi e VTA cu ta duna nan admision temporal pa bin Aruba y haci e pruebanan medico necesario.
Cu e aclaracion aki, kier evita cu empresanan y solicitantenan sigui inverti tempo y recursonan den solicitudnan cu no por haya aprobacion debi na incumplimento di e rekisitonan di admision.
Cumplimento di ley ta un obligacion. Empresanan y personanan cu emplea trahadonan stranhero tin e responsabilidad pa sigura cu nan ta cumpli cu tur e rekisitonan legal aplicabel. Si no cumpli cu nos leynan, esey por resulta den un multa considerabel.
