Ex-minister, Otmar Oduber ta bek den noticia durante un otro conferencia di prensa na cas di su mayornan, y e biaha aki tocante un keho cu su persona a entrega contra Cuerpo Policial, Landsrecherche y Recherche Samenwerkingsteam (RST).
Riba 19 di september a haci denuncia oficialmente na PG (Procurador General), kende Oduber ta bisa ta su ultimo speransa di creencia cu algo husto por pasa.
Otmar Oduber ta acusa y denuncia Cuerpo Policial Aruba, Unidad di BCI, y ambtenaar cu a firma e shete procesverbaalnan contra Oduber.
E ex-mandatario a enfatisa cu a traha shete procesverbaal cu a resulta tambe cu a caba cu bida di su famia pa cuater aña largo, pa despues bisa tin un fout y hala cos un banda. “Anto bay wak unda nos ta hinca hende den camber, sconde nan den un cura y purba obliga nan declara contra mi.” Aki Oduber ta subraya cu tin weganan andando cu autoridadnan Hulandes cu kier demostra cu politiconan Arubano ta corupto. Oduber: “Awel aki nan a dal nan pia duro, bo no tin niun prueba, niun prueba!”
