Fundacion Siñami Paso pa Paso Aruba a lanta oficialmente dia 4 di April 2009 y e meta ta pa duna orientacion y guia integral di diferente disciplina pa beneficia mucha, hoben y adulto cu algun discapacidad y nan famia.
Na aña 2022 – 2023 nan team profesional boluntario a crea e prome edicion di e buki e flor di balornan “ Un tesoro pa mi bida”. E buki aki ta un continuacion di e lema di nos fundacion cu ta e flor di balornan, husticia, perseverancia, honradez, pordon, humildad, puntualidad, sinceridad, responsabilidad, lealtad, amor, berdad y respet. Cada balor ta un capitulo di e buki.
Den e buki aki kier promove lectura y actividadnan pa famia haci algun ehercicio cu lo yuda mucha y hoben den su desaroyo personal y pa den futuro por aporta na e comunidad den un forma positivo y productivo.
E buki ta conta cu 156 pagina cu tin algun ehercicio interactivo enfoca riba balornan. Lo reforsa e habilidadnan social emocional, Psicomotricidad, Habla y Lenguahe. Ehercicio pa mehora atencion, concentracion, expresion, comprension, lectura, scritura, conoce emocionnan, tecnica pa regula emocionnan, alfabet, numbernan, identifica e curpa, importancia di famia, nocion di tempo, derechonan di mucha y hopi mas.
E di dos edicion di e buki E flor di balornan “ Un tesoro pa mi bida” 2024 -2025 lo conta cu algun compania / organisacion cu lo adopta un balor. Lo bende e buki pa un suma simbolico pa recauda fondo pa e continuacion di nan proyecto integral despues di scol. Nan ta duna guia profesional di psicologo, logopedista y terapista na un grupo vulnerabel di mucha y hoben cu discapacidad intelectual leve (L.V.B) y nan famia.
E bukinan lo bay wordo reparti pa muchanan di 6 pa 15 aña na algun scolnan, centronan di bario, durante e reparticion di e buki nos team profesional boluntario lo duna algun workshop informativo y educativo.
Nan kier a duna danki na Samenwerkende Fondsen Cariben y CEDE Aruba, directiva di F.S.P.P.A y team profesional boluntario cu a haci e buki aki un realidad Dr. Eva Rusz, Psicologo / Psicoterapeuta, Lic. Maria Cristina Harsveld, Logopedista / Pedagogia Infantil, Angelica Ayala, Psy.M. Psicologo, Yaxzuly Toyo, Psicologo Infantil, Rubiela Gracia, MSc. Psicologo Educativo, Carlos Falla, MS Neurociencia Organisacional / Terapista Educativo.
E buki di balornan “Un tesoro pa mi bida “ ta forma parti di e proyecto integral despues di scol pa mucha y hoben cu discapacidad intelectual leve (L.V.B), y e prome edicion ta financia pa Samenwerkende Fondsen Cariben y CEDE Aruba.
