Diadomingo pasa Gianni’s Nutrition Center a cumpli 34 aña di existencia. En conexion cu esaki, e forma con nan ta celebr’e ta cu diabierna awor, 22 di september, tin 20% di descuento ariba tur producto!
Alex Croes, propietario di Gianni’s Nutrition Center, a indica cu diabierna awor, 22 di september, den henter tienda tin 20% di descuento y esaki ta en conexion cu Gianni’s Nutrition su 34 aniversario.
Inicio:
Tur cos a cuminsa dia 17 di augustus di aña 1988 cu e apertura oficial di Gianni’s Gym na Santa Cruz. E tempo ey Sr. Croes a bula bay Merca pa busca producto Mericano, algo cu semper el a busca. Aki, el a cumpra suplementonan, di cual e tempo ey tabata deportivo. Di eynan Sr. Croes y su team a cuminsa bende suplemento deportivo.
Prome na Aruba:
Na aña 1988, Gianni’s Gym tabata e unico na Aruba cu tabata bende e suplementonan e tempo aki. Di eynan a bin cu e idea pa habri e Nutrition Center y cera e gym.
“E tempo ey tabata haci falta p’un Nutrition Center. Ironia tabata cu e aña siguiente, dia 17 di augustus, nos a huur e luga na unda cu nos ta situa actualmente, p’asina habri Gianni’s Nutrition Center oficialmente dia 17 di september 1989”, Sr. Croes ta comenta.
Un decision tuma di ofrece pueblo cu un “one day sale” ta unu cu tur aña nan ta tuma pa celebra nan existencia den nos comunidad aki na Aruba. Sinembargo, e aña aki e fecha a cay riba diadomingo y esey a pone cu ta ideal pa celebr’e den fin di siman, esta diabierna awor 22 di september.
Den henter e tienda Gianni’s Nutrition Center ta ofrece 20% porciento di descuento.
Prome benta:
E prome benta riba 17 di september na aña 1989, 34 aña pasa, tabata di e prome cliente cu a yega pa cumpra un bara di chuculati di Tiger Milk di e marca Weider Supplement, Sr. Croes ta recorda.
Despues a cambia e concepto y a bay mas den e parti di salud:
Segun Croes, entre 50% y 60% porciento di esunnan cu ta drenta ta rondia algo pa mehora nan salud, nan fisico y hasta ta bay asina leu ta combina cu nan remedi pa e enfermedadnan cu ya nan no ta weita resultado p’e. Esaki ta algo cu Gianni’s Nutrition Center ta haci pa hopi aña.
A cuminsa pocopoco, pero awo ta ful den esaki ya cu hopi hende ta preocupa pa nan salud y no ta haya resultado p’e. Alex Croes ta un persona cu tin sumamente hopi conocemento den e materia di salud y di kico por duna pa reemplasa remedi of combina cu remedi. Esaki ta algo cu semper ta sugeri e clientenan.
Croes a expresa cu semper nan ta habri 9:30 di mainta pero e no ta corda cua ta e ultimo bes cu el a sali pa 6:30 pm. E orario di mas laat cu su persona a sali di eynan tabata 8:45 pm na luga di e orario normal. “Semper nos ta habri pa cualkier cliente cu drenta. Nos no ta bisa nan cu nos ta bay cera. Semper nos ta keda yuda nan te na ultimo”, Croes a enfatisa.
Gianni’s Nutrition Center ta habri di 9:30AM pa 6:30PM di dialuna pa diasabra y ta situa den Hendrikstraat 19. Nan ta situa otro banda di e Palacio di Corte Aruba.
Ta invita tur hende pa yega y disfruta di e 20% porciento di descuento.
E lema cu semper ta uza ta “Nos ta educa bo riba bo salud y loke bo ta bay cumpra. Bo salud, nos pasion”
