E ex-hungado di futbol Mericano, O.J. Simpson a fayece na edad di 76 aña, despues di a bataya cu cancer detecta na februari y pa cual e tabata ricibi kimoterapia desde e tempo ey.
Su famia a anuncia esaki diahuebs, pero e ex-hungado a fayece diaranson, 10 di april. O.J. Simpson tabatin un carera profesional importante y tabata conoci na nivel mundial pa tabata sospechoso den e asesinato di su ex-casa Nicole Brown y un amigo di dje, Ronald Goldman. Despues di un huicio largo, hopi mediatico, el a keda absolvi di e dobel asesinato aki na 1995.
Despues di e caso hudicial aki, cu a marca su carera den tur sentido, na 2007 un biaha mas ta aresta O.J. Simpson na Las Vegas (Nevada). Tabata acus’e di varios delito, entre nan, robo arma, extorsion y secuestro. A declar’e culpabel un aña despues y condena na trinta y tres aña di prizon. Pero el a Sali den libertad condicional despues di a cumpli e minimo di e sentencia.
HISTORIA DI DOBEL ASESINATO
Simpson a divorcia di Nicole Brown, cu kende e tabatin dos yiu, despues cu Brown a denuncie pa violencia domestico. Poco tempo despues di nan separacion, na 1994, Nicole Brown y un amigo di dje, Ronald Goldman a muri ora cu desconocinan a hinca nan mata pafo di e cas di Brown. E ex-futbolista tabata e prome sospechoso. Arma c’un ekipo di e miho abogadonan y despues di un huicio hopi mediatico, tanto den e pais como den exterior, a absolv’e na 1995. Mas di 90 miyon persona na Merca a sigui e veredicto ‘live’. Asina tambe el a bira e evento mas mira den e pais.
Algun aña despues, na 1997, un corte civil a conden’e p’e crimenan y a oblig’e na paga mas di 33 biyon dollar na daño y perhuicio.
