Ora ta papia riba proteccion di esunnan mas vunerabel den comunidad, recien a sali un discusion pa redobla e pension. Fraccion di MEP no ta haya esaki mucho factibel y nan tambe ta core prome cu campaña haci algun ahuste, di parti AVP ta pensa negosha algun cos cu Hulanda, y tambe OPPA recientemente ta bisa cu e lo ta bon si di berdad lo ta algo factibel.
Parlamentario independiente Gerlien Croes di otro banda ta expresa cu ohala esaki por y lo ta desea pa esnan cu ta presenta e ideanan aki mustra factibilidad financiero di dje. “Mi ta tuma nota cu ta cuminsa bin cu promesanan politico, nan mester ta promesa realistico tambe.” Ora ta papia di redobla pension, SVb caba a taha cu edad di pension tambe lo mester subi.
E ora ey lo tin cu papia di realidad y no cuminsa un aña prome cu eleccion ta hiba campaña di custumber, campaña tradicional di promesa cu despues nos tur sa caba kico lo ta e resultado segun Croes.
E parlamentario ta enfatisa cu pensionadonan tin mester di ayudo urgente berdad, y Aruba ta pasando generalmente den un desaroyo di populacion cu lo tin cu bay atende cu ne grandemente. Tin grupo di hende di edad cu ta hopi grandi na Aruba y hopi persona ariba 65 aña cu mester ayudo financiero, mester di cuido, mester vivienda, y ta topiconan cu mester atende cu ne p’e proximo decada. “Mi ta kere no tin tempo pa sinta duna hende speransa falso of duna hende promesa cu nan mes no sa ainda con lo cumpli cu ne.”
