Na Aruba e situacion di parkeer ta mustra di ta pega, den sentido cu ainda no tin un solucion concreto den loke ta e maneho of structura completo di Aruparking, parkeer den nos centro di ciudad y otro areanan rond e isla. Mientras cu na Aruba ainda ta purbando di drecha e situacion, Gwendell Mercelina, parlamentario di Corsou (Partido Nashonal di Pueblo – PNP) ta bisa cu na nos hermana isla a caba di firma un acuerdo nobo, un ‘parking authority’ nobo despues di hopi tempo pa centro di ciudad.
Mercelina ta splica cu ta maneha esaki cu Downtown Management Organization hunto cu otro instancianan.
E contract cu tabata hopi largo a termina pa cual mester a bin cu un forma nobo pa atende cu esaki. Ora e proceso tabata canando, tur hende tabata kier y por ainda parkeer gratis den centro di ciudad. Pa motibo di e proceso aki por tuma nota cu na Corsou tambe tin e problema di haya punto di parkeer den centro di ciudad. “Ta hopi dificil pa hende parkeer, solamente na algun luga area tin espacio specifico, manera pa parlamentarionan of den centro di Husticia. Pero pa Punda y Otro Banda aworaki e ta por nada, pero prome cu fin di aña e proceso nobo ta cuminsa.”
UN SISTEMA ‘SMART’
Di loke parlamentario Mercelina a bin compronde, e sistema nobo cu lo introduci na Corsou ta uno completamente ‘smart’ dus lo mester wak su efecto. Loke tin aworaki ta percura pa e cen cu ta hinca den e sistema di parkeer aki, hende ta mir’e tambe bek den e facilidadnan cu tin den centro di ciudad. Antes ya caba bo ta mira number cual tur t’ey ainda, y a base di esey lo tin cu paga. Tambe lo tin patrol coriendo den ciudad pa controla ken ta paga of ken a pasa su ora. Den e forma nobo cu lo bini cu ne ta bay tin e siguridad aki pero mucho mas efectivo pa hende cumpli. “Den e cuadro di maneho di ley, hende cu ta parkeer unda no ta permiti, lo mester haya boet di klem. Hopi biaha bo ta mira klem oraño pa proteha tambe pa no haci uzo di luganan di parkeer cu no tin.”
Den Caribe e cultura ta cu nos sa pasa cierto limite cu no tin, pero mester por proteha e infrastructura di e pais pa tur cos keda bunita tambe. Den cuadro legal esaki ta regla, segun Mercelina, p’esey tambe tur cos a cana via un proceso pa medio di gobierno y parlamento pa loke ta e maneho aki.
