E caso tan spera y cu tabata riba agenda di Corte ayera no a yega na un sentencia ainda. Corte no a duna motibo dicon no a dicta sentencia. “Probablemente nan ta mand’e riba rol di otro luna. No ta prome bes pasobra biaha pasa a sosode mesun cos y mester a warda un luna mas”, asina un fuente cerca di e proceso legal a conta ayera.
Hopi den comunidad a keda pendiente pa e sentencia final den e caso cu a cuminsa desde 2016, pues cinco aña di procedimiento y bataya legal entre abogadonan di e compania Digicel y di Gobierno di Aruba, representa pa Directie Telecommunicatie Zaken (DTZ).
Un fecha nobo pa e sentencia no tin ainda pero, manera cu ta anticipa, probablemente Corte ta pas’e pa otro luna. Sa pasa cu sentencianan asina por dura mas tambe, pero ta keda na prerogativo di hues pa dicidi riba e fecha den cual e ta dicta un sentencia.
E caso riba su mes ta relaciona cu e peticion cu Digicel Aruba a haci pa por core un kabel di fiber bou lama pa por ofrece servicio di internet pa Aruba, independientemente for di Setar. Te cu awor, tur compania mester pasa via e hub di Setar pa por subi world wide web. Cu e peticion aki y si hues honr’e, Digicel lo tin su esun kabel di fiber cu lo brind’e velocidad di como 100 biaha mas lihe di loke e tin awo y cu mas espacio pa acomoda mas cliente pareu.
Na momento cu corte dicta sentencia, e chens ta grandi cu lo kibra e monopolio di Setar pa ofrece servicio di internet pa Aruba. Awendia data a bira un necesidad escencial pa nos isla, tanto pa negoshi como tambe pa casnan individual. Nos bida ta draai rond di tecnologia y hopi tin di haber directamente cu uzo di data of internet.
E lo por dura un luna mas awo prome cu atrobe e sentencia por aparece riba agenda di corte, cu speransa cu e ora si lo bin un decision cu por varia entre mantene e status manera cu e ta, den cual Setar tin derecho exclusivo pa maneha internet na Aruba of ta habri e mercado pa Digicel tambe cometi riba prijs y servicio.
Competencia a siña nos cu cliente ta sali beneficia y ora cliente sali beneficia, e ta afecta henter nos economia den forma positivo.
