Parlamento di Aruba a manda carta pa Union Europeo y Nacionnan Uni. Fraccion di AVP sinembargo no a firma e carta aki pa loke ta trata e pegamento cu tin entre gobierno di Aruba y gobierno di Reino. Tin reclamo di parti di gremionan y esnan cu ta cuestiona gobierno pa loke ta transparencia y tambe e proceso di negociacion cu tin actualmente. Nel Oduber, ex Prome Minister di Aruba a comenta cu nan ta hopi aña laat.
Ocho aña largo a firma contract di CITGO. No por a lesa ningun caminda cu gremio a lesa e contract. Dia di CAFT, pidi kico ta contenido di e situacion cu Hulanda mester a bay asina leu di bin cu un aanwijzing, bin cu un KB. Oduber nunca a tende ningun gremio cuestiona e megadebe. Con grandi e debe ta y cu nos ta bay paga 25 aña largo, prome di 85 miyon extra pa e proyectonan PPP. Ora bo ta negosha pais cu pais, logicamente algo asina delicado, den liñanan grandi por ehempel cu tin dos Rijkswet na caminda, kico ta e condicionnan di Hulanda y gobierno cu gobierno.
Mester a mira caba e carta pa Nacionnan Uni y Union Europeo cu AVP no a firma. E cos aki ta pone Oduber corda e wega tempo cu e y Henny Eman a firma un protocol dia 21 di october na 1993, pa busca un base mas amplio y e wega a start mesora. AVP a mira un oportunidad. Otro aña tin eleccion y no kier mara nan mes na nada.
E gremionan comprometi a firma hala di protocol cu AVP. Nan ta mira cu un dado momento nan no por yuda AVP si nan no tin tur e datosnan. Ta algo hopi serio ta sosodiendo, segun e ex mandatario. Tin cosnan cu un dado momento, gobierno mester tin e libertad y trankilidad pa negosha. Un cos gremionan por tin sigur, conociendo gobierno y ta duda cu nan ta bay bende Aruba cu Hulanda.
Negociacion entre gobierno y gobierno ta algo delicado y locual gobierno di Aruba a haci, ta informa kico ta e esencia di discusion, kico ta aceptabel of no aceptabel y den e margen di esey ta keda informa, pero no por bay pone delaster un carta riba caya pa discusion. No mester lubida cu na e momentonan aki, cada hende ta mira su oportunidad politico. Nan ta mira cu otro aña tin eleccion y si ta di mata e gobierno ta haci’e. E situacion ta asina delicado pa nos tur y pa mundo henter, cu e no tin espacio, ni pa politica partidario. E espacio cu tin ta cu nos ta fia placa for di Hulanda, cu nos ta paga Hulanda e placa y ban wak con ta drecha e economia.
Ban cuida curpa y ban sali afo. No lo ta straño cu lo a manda Hulanda un carta atrobe cu nan no ta parti di e discusion, pa trece e division na Aruba. Oduber ta hay’e hopi leu busca. Den pasado e contract di Citgo, no a pidi p’e. Oduber no a lesa cu gremio a pidi gobierno pa esaki. Ni Parlamento di Aruba a haya e contract aki mira. Gobierno tin un deber cu e cosnan fundamental manera dolarisacion, e dos rijkswetnan, e companianan di gobierno.
Nos a hinca den Statuut di Utilities, WEB NV, SETAR y tur, e companianan aki no por wordo pasa pa ningun hende sin dos tercera parti di Parlamento a aproba esey. Un parlamentario mester por sa cu e gobierno aki no tin dos tercera parti. No tin un gobierno pa bisa Hulanda, mediante cualkier Rijkswet tuma e companianan aki over. Nan tambe mester vota p’e. Si no vota p’e y no tin dos tercera parti, e no ta tuma luga. Tin hopi siguridad cu e gobierno den pasado a build in pa loke ta trata companianan di gobierno.
Por lo demas, e asunto laboral, ta compronde, cu no por habri porta pa tur hende y no tin condicionnan poni. Dia a flexibilisa e mercado laboral, por conta cu esnan studia, no tin trabao pa nan mas. Nan no por competi den flexibilascion. Tin cosnan cu segun e ex mandatario, cu gremionan sa cu gobierno no por give in bao di ningun condicion na Hulanda.
E otro ta, con ta sali afo. Lo ta bon pa gremionan tambe cuminsa busca alternativa si un dado momento Hulanda no ta dispuesto mas pa duna Aruba despues di a cumpli cu e dos tranchenan, e di tres tranche su condicionnan. Hulanda no ta bon bezig. Nan Prome Minister ya a caba di daña den Europa. Por mira Italia, Spaña, Grecia y Portugal bula afo. Por a mira presidente di Francia y e canciyer di Alemania cu a keda disgusta di un actitud berdaderamente cu no ta mustra cu bo kier duna un man den un calamidad.
Si cos tabata normal, y cu un actitud asina, ta di compronde. Si Hulanda actitud ta fuerte pa cu nos, den un cos normal, ta comprensibel. Pero no den un situacion cu keto bay hotelnan ta bashi, keto bay na Merca miyones di hende ta wordo contagia. Por mira nos mercado di mas grandi ta den problema. Un tiki comprension lo ta bon, segun Oduber. Of e kier sa pakico gremionan ta pidi pa paga tur debe. Manda bisa Hulanda trata nos manera 10-10-10, paga tur nos debenan y wak con ta sigui. Tin alternativa. Si kier yuda, yuda pero carga responsabilidad pa loke ta pone riba papel.
