Despues di a reuni cu AZV awemainta, e asociacion di Dokternan di Cas (HAVA) a dicidi di pospone nan medidanan por lo pronto. “Nos ta haya cu tin oido y posibilidad pa sigui delibera den e proximo dianan pa por yega na un acuerdo pronto. Esaki ta nifica cu Dokternan di Cas lo ta habri e siman ki normalmente”, asina drs. Joachin van Trigt, Presidente di HAHA, a manda informa un rato pasa.
“Nos ta aclaria cu nos meta no ta pa perhudica nos pashentnan. E ta pa sigura y garantisa integridad di nos cuido medico. Pa sigura nos pashentnan cu bo Dokter di Cas por sigui brinda Bo e servicio cu nan ta custumbra”, asina Dokter van Trigt a splica.
Cu e medidanan aplica, e practicanan lo topa problemanan financiero severo cu consecuencianan grandi pa continuidad di cuido. Cu ssaki HAVA ta subraya cu e comunicado di prensa cu AZV a publica awenochi, cu dokternan di cas ta sigui cu nan medidanan, NO ta corecto mas.
