Un noticia cu a shock comunidad mainta trempan ta cu e bos di e clasico di cancion di Pasco ‘Wela’ Carolyn Kelly a bay sosega. Famia ta den shock cu fayecimento inespera di Carolyn na Spaña.
Carolyn tabata di biaha di placer pa topa cu su yiunan y celebra dia di mama cu nan a termina den tristeza pa henter famia. Den un supermercado na Spaña, diripiente el a dal abou y a cay den un coma. Un informacion cu ta bayendo rond ta cu el a fayece di su pancreas
Carolyn ta yiu di e legendario musico y cantante Vicente Kelly (dfm) Carolyn a forma parti di e grupo di gaita Chicas Gaiteras. Chicas Gaiteras ta funda na aña 1992 pa Marion Maduro cu hopi exito di cantica di Pasco riba nan nomber.
Carolyn ta e interprete di un di e cancionnan mas grandi di Pasco cu tur fin di aña mester resona na e radionan local. E cancion aki tin un mensahe hopi profundo cu ta papia di e sentimento special di Wela.
Carolyn mester a celebra su 50 aña dia 28 di mei proximo. Forsa na su yiunan, su pareha y henter famia den e momentonan dificil aki.
