Mientras cu CAft ta cuestiona Gobierno riba e reduccion di gastonan di personal di riba 12 miyon florin e aña aki ainda, toch ta haciendo intento pa nombra cantidad di Ambtenaar den e aparato gubernamental. Fuente den Departamento di Recurso Humano (DRH) y den Cocolishi a confirma cu sigur Ministernan Glenbert Croes, Xiomara Ruiz-Maduro y Dangui Oduber ta purbando e practica aki. DRH ta convenci cu no tin unanimidad den Conseho di Minister pa e formula aki.
Gabinete Wever-Croes a laga sa despues di mas o menos 3 luna na poder cu nan a topa cu hopi coordinador di Gabinete Mike Eman II cu nan a manda cas. Hasta a menciona 300 empleado. E tempo ey a splica cu e Gobierno anterior mester a regla nan documentonan corecto si acaso nan lo tabata kier pa nan keda traha, dor di por ehempel nombra nan como Ambtenaar.
E realidad sinembargo ta, cu for di hopi aña caba, DRH ta hibando e maneho di duna tur empleado nobo un contract di entre 1 pa 5 aña prome cu nombra nan den servicio permanente.
E proceso pa bira Ambtenaar ta largo y ta rekeri conseho di DRH y e decision mester ta sosteni dor di Conseho di Minister y despues cu firma di Gobernador den un Decreto Gubernamental. No ta sigur cu tur e instancianan ariba menciona lo coopera pa nombracion di empleadonan den servicio permanente den Gobierno. Di otro banda, e formula aki ta trece un maneho cuestionabel di Gobierno, pasobra no ta tur sostenedo ta conta cu e mesun “suerte” aki di drenta como Ambtenaar.
Expertonan den DRH a sigura na nos cu e formula uza pa e ultimo añanan ta pa garantisa cu e empleado cu bira Ambtenaar ta dinamico, ta traha cu metanan acorda, ta cumpli cu su trabou y ta motiva. Si den e añanan di contract nan nota cu e no tin e cualidadnan ey, lo duna conseho na Gobierno pa no haci un persona asina Ambtenaar.
E rabiamento den Cocolishi awor mas bien ta cu hopi eyden a haya trabou berdad, pero como contractant, pues nan sa cu ora Gobierno bay, nan tambe mester bay hunto cu e Minister cu a tume. E ora e mesun storia y e mesun sonrisa riba nan cara ora a bisa e Avpistanan “fiesta a caba” lo ta aplicabel pa nan tambe. Mirando cu esaki ta un Gobierno di coalicion, e chensnan ta mas grandi compara cu ora ta un Gobierno solido di 13 asiento.
