Diabierna, 24 di Augustus, tabata un dia hopi importante y excitante pa tur esnan cu a cera conoci cu e cas di sra. Faustina Tromp, segun Neriza Quant-Giel. Un cas di antaño bunita conserva, no solamente su construccion intacto pero tambe cu tur su mueblesnan di e epoca di comienso di siglo XX. Su magashina, fogon, cura di transhi, palo di watapana y druif den e hardin. Fundacion Mi Cutisa ta sumamente contento cu e dia aki, ya cu un soño a bira realidad.
Fundacion Mi Cutisa
Pa esnan cu no sa, un Cutisa ta algo pa pone na pia, cu cierto parecido na pargata of sandalia. E cunukero y piscado mes tabata traha su mesun cutisa. E parti abao ta di cuero mayoria biaha. Tabata bisti cutisa na tur momento, entre otro pa cana distancia largo pa bay traha den cunucu y bay pisca.
Fundadora di Fundacion Mi Cutisa ta sra. Defunto Imelda Eckmeyer-Bermudez. E ta un baluarte di Noord. E persona cu entre otro a lanta carnaval na Noord. E tabata tin un deseo grandi, esta di trece cultura mas cerca na publico, pero no solamente na Aruba, pero na Antias y Caribe en general. Hunto cu su yiu muhenan Mavis Krozendijk-Eckmeyer y Voca Eckmeyer, a bin cu un idea di tin un cas di antaño netamente sin pone ni kita, manera di antes y a saca potret di ciudadano y turista den trahenan tipico. Nan a cuminsa recolecta paña y acesorio pa e proyecto aki. A haci algun try out. Loke tabata falta ta e cas tipico permanente pa e proyecto aki ranca sali.
Fundacion Mi Cutisa a wordo lanta oficialmente 10 di Maart, 2005. A organisa varios proyecto di cultura desde e fecha ey te cu e aña aki. Pero e deseo di un cas no a materialisa ainda.
Sra. Imelda Eckmeyer a bay cerca Señor riba dia 1 di October, 2009. Pero su soño y deseo a keda den cu su yiunan y e fundacion.
Entre minister di cultura, Monumentenfonds, y posiblemente cu financiamento pa Aruba Investment Bank y sra. Faustina Tromp, e soño y deseo di Fundacion Mi Cutisa ta yegando mas cerca. Fundacion Mi Cutisa lo bay maneha e bunita cas, como un producto cultural, educativo, social y turistico. Y asina cumpli cu e promesa na sra. Imelda Eckmeyer-Bermudez, di trece nos cultura mas cerca di tur Arubiano, Antiano y nos bishitantenan.
Lo bay tin sacamento di potret den trahe tipico cu lo bira sin duda un atraccion turistico, pero tambe e cas lo bay fungi como material di enseñansa pa nos hobennan. Tambe lo por tene varios festival di cuminda, cos dushi tipico, por duna charla pa esnan interesa.
En fin, pa engrandece nos cultura Arubiano. Lo bay yama e bunita cas aki “Cas di tan Tin” pa su futuro generacion, pa keda corda cu e cas aki tabata di nan tanta stima “Tan Tin”. Pronto lo bay invita henter pueblo di Aruba pa pasa bishita e cas.
E logro mas grandi mes ta rescata un patrimonio cultural den un estado fabuloso. Lo no bay tin mester mucho restauracion grandi, pasobra e cas ta hopi bunita. Sra. Faustina Tromp a cuida su cas asina bon. Ta pesey a yama un danki grandi na sra. Faustina Tromp pa e pasenshi y confiansa den fundacion Mi Cutisa. Tina a cuida e cas di su mayornan cu asina dedicacion y amor. Tina su sobrinonan a hunga un rol grandi den convence nan tanta pa no bende e cas cu cualkier persona of instancia, cu sigur lo a benta e cas abao pa construccion di algo comercial.
Fresco ta den memoria e bashamento abao di Rio Grande Store na skina banda di Misa Santa Anna na Noord.
