Minister di Salud Publico, Dangui Oduber, a reuni cu Departamento di Salud Publico (DVG) riba su vision, cu ta mehoracion di e calidad di cuido, mehoracion di servicio y baha e tempo di espera na e specialistanan. Lo busca mas specialista, inverti y ehecuta e programa nacional di prevencion, enfoca riba biba un bida mas saludabel. Den esaki ya caba gobierno a anuncia cu lo bay bin cu un clinica pa combati obesidad. Esaki ta pa yuda e personanan obeso door di ofrece nan guia por medio di un trayecto pa percura pa nan por mehora nan salud, cu e meta pa preveni complicacion di salud pa motibo di obesidad.
Durante e reunion, Minister Oduber a trece dilanti cu DVG lo mester bira un consehero administrativo, caminda ta determina e maneho di salud publico na Aruba. Lo mester enfoca hopi riba cuido preventivo. Tambe minister Oduber a combersa riba e hecho cu lo mester reenforsa e departamentonan di Salud Publico y DBZ. E pandemia a pone tur hende realisa con importante salud publico ta pa cuido medico na Aruba, p’esey e mandatario ta enfatisa riba e importancia pa inverti den prevencion y reenforsa den e Departamento di Salud Publico.
A papia tambe riba e parti innovacion den salud publico haciendo uzo di tecnologia pa mehora e servicio cu e Departamento di Salud Publico ta duna na pueblo di Aruba. Minister Oduber su deseo ta pa, durante e periodo di gobernacion aki, pa automatisa e sistema di peticion di restaurant pa haci e proceso mas eficiente y rapido. Tambe pa haci uzo di innovacion pa sincronisa e departamentonan di DVG, Brandweer y KPA pa di e forma aki por duna un miho servicio na comunidad.
Tambe e mandatario a palabra cu lo tin consulta regular entre Ministerio di Salud Publico, Inspectie Volksgezondheid Aruba (IVA) y DVG pa tur partido ta riba e mesun liña di pensamento na tur momento.
Finalmente Minister Dangui Oduber ta haya cu e reunion tabata fructifero caminda cu DVG a compronde su mensahe y a compromete nan mes pa ehecuta e maneho y vision di Ministerio di Salud Publico.
