Awe ta un fecha historico, no solamente pa Sidney Ponson Charity Foundation (SPCF), pero tambe pa e mundo di baseball. Hustamente riba e fecha cu S.V. Bubali ta cumpli 78 aña di existencia, a firma un acuerdo di cooperacion cu SPCF pa construccion di un veld di baseball y basketball cu lo bin riba e compleho deportivo cu lo traha riba e tereno actual di veld di Bubali.
S.V. Bubali tin plannan grandi pa deporte. Nan lo crea un compleho deportivo di cual e parke di baseball lo ta solamente un parti di e proyecto aki. E fundacion di e ex-pelotero di Grandes Ligas y orguyo di Noord, ta realisa un gran soño di dje. Detayenan exacto no ta cla ainda, pero di acuerdo cu Sidney Ponson, lo dedica atencion awo na un torneo di pesca cu ta organisando y su tras lo cuminda cu e proyecto pa recauda fondo y keda cla cu e veld aki di baseball pa henter e bario di Bubali y e districto di Noord.
No tin miho forma pa mantene muchanan leu di vicio door di encurasha nan pa haci deporte, hinca nan tempo den algo sano y baseball, manera cu e mes a experiencia personalmente, ta un bon herment pa mantene hubentud riba bon caminda. E plannan di e fundacion ta grandi y lo cambia mundo di deporte, principalmente duna baseball su gloria bek.
Aña pasa a funda Sidney Ponson Charity Foundation. E fundacion aki no ta enfoca solamente pa adulto, sino tambe pa e muchanan y ta spera cu den futuro nan lo bay bin cu torneo of ideanan cu por ta den interes general.
Sidney Ponson ta naci na Aruba dia 2 di november 1976 y tabata un pitcher profesional den Major League Baseball na Merca. Den su miho tempo, e tabata pitcha cu un velocidad di 95 miya pa ora. Aunke el a cuminsa den Big League for di 1994 caba, el a hacik su debut na aña 1998 cu Baltimore Orioles. Na aña 2003 a condecor’e na Aruba como Ridder in de Orde der Oranje Nassau di Reino Hulandes. Sidney Ponson a hunga mayoria di su carera cu Baltimore Orioles y despues a pasa pa San Francisco Giants, St. Louis Cardinals, New York Yankees, Minnesota Twins, Texas Rangers y Kansas City Royals.
Mester menciona cu Sidney Ponson a firma un contract di tres aña cu Baltimore Orioles pa un balor di 22.5 miyon dollar. Na aña 2009, despues di un disputa, a yega na un acuerdo pa bay for di otro pa e balor restante di e contract, pa un suma total di 10.1 miyon dollar Mericano.
